Былы савецкі лідэр Міхаіл Гарбачоў папярэдзіў, што напружанасьць у адносінах паміж Расеяй і эўрапейскімі дзяржавамі ў сувязі з крызісам ва Ўкраіне можа прывесьці да буйнога канфлікту ці нават да ядзернай вайны.
«Сутыкненьне такога кшталту непазьбежна прывядзе да ядзернай вайне», — сказаў ляўрэат Нобэлеўскай прэміі міру 1990 нямецкаму часопісу Der Spiegel, які выйдзе ў сьвет у суботу.
«Мы ня выжывем у бліжэйшыя гады, калі ў кагосьці здрыгануцца нэрвы ў гэтай перагрэтай сытуацыі», — дадаў Гарбачоў, якому цяпер 83 гады. «Я не кажу гэта легкадумна. Я вельмі занепакоены,» — падкрэсьліў ён.
Сутыкненьне такога кшталту непазьбежна прывядзе да ядзернай вайне
Напружанасьць у адносінах паміж Расеяй і заходнімі краінамі вырасла пасьля таго, як прарасейскія сэпаратысты ў пачатку 2014 ўзялі пад свой кантроль раёны Ўсходняй Украіны, а Расея анэксавала Крым. ЗША, НАТА і Эўрапейскі Зьвяз абвінавацілі Расею ў адпраўцы войскаў і ўзбраеньняў, каб падтрымаць сэпаратысцкія паўстаньні і ўвялі санкцыі ў дачыненьні да Масквы.
Расея адмаўляе перадачу паўстанцам ваеннай падтрымкі і адхіляе заходнюю крытыку анэксіі Крыму, заяўляючы, што жыхары Крыму прагаласавалі за далучэньне да Расеі на рэфэрэндуме.
Гарбачоў, якім шырока захапляюцца ў Германіі за яго ролю ў падзеньні Бэрлінскай сьцяны і за крокі, якія прывялі да ўзьяднаньня Германіі ў 1990 годзе, перасьцярог наконт заходняга ўмяшаньня ў крызіс ва Ўкраіне.
