Лінкі ўнівэрсальнага доступу

Эўракамісія прапануе Ўкраіне крэдыт на два мільярды даляраў


Ілюстрацыйнае фота

Ілюстрацыйнае фота

Эўрапейская камісія прапанавала даць Украіне 1,8 мільярдаў эўра, або больш за 2 мільярда даляраў сяреднетэрміновага крэдыту. Гэтак Эўропа хоча дапамагчы цяжкай эканамічнай сытуацыі ва Ўкраіне.

Аднак, як адзначылі прадстаўнікі выканаўчай улады Эўразьвязу, Украіна мусіць працягваць рэформы ў межах праграмы Міжнароднага валютнага фонду і ажыцьцяўляць эканамічную і фінансавую палітыку, ўзгодненую з Эўразьвязам.

Рашэньне пра крэдыт Кіеву мусяць яшчэ ўзгадніць усе 28 краінаў Эўразьвязу і Эўрапейскі парлямэнт.

Эўразьвяз ужо даў 1,6 млрд. эўра пазыкаў для Ўкраіны, каб дапамагчы ўраду Ўкраіны, які знаходзіцца ў цяжкім фінансавым становішчы.

Місія МВФ сёньня аднавіла перамовы з уладамі ў Кіеве з нагоды умоваў для магчымага новага крэдыту Украіне. Крэдытная праграма МВФ прадугледжвае суму 17,1 мільярдаў даляраў, аднак пакуль ва Ўкраіну паступіў толькі транш крэдыту на 4,6 мільярда даляраў.

XS
SM
MD
LG