Слоўнік сучаснай украінскай мовы і слэнгу «Мислово» прызнаў «кібаргаў» словам 2014 году. Якое б слова прапанавалі вы?
Слова «кібарг», якое атрымала сваё новае значэньне ў верасьні 2014 году, хутка падхапілі карыстальнікі сацсетак, а ўсьлед за імі і традыцыйныя СМІ, і палітыкі. Прэзыдэнт Украіны Пётар Парашэнка нават выкарыстаў слова «кібарг» у сваім навагоднім звароце.
Характэрна, што слова «кібарг» у значэньні «абаронцы Данецкага аэрапорту» падараваў украінскай мове ў верасьні 2014 прарасейскі баявік. Тады ён спрабаваў растлумачыць, чаму перадавыя атрады прарасейскіх сіл у поўным узбраеньні ня могуць узяць Данецкі аэрапорт, які абараняе некалькі дзесяткаў украінскіх вайскоўцаў са стралковай зброяй.
Слоўнік «Мислово» выбірае слова году другі раз. Летась словам году быў названы «Эўрамайдан». Онлайн-слоўнік зьяўляецца інтэрактыўным праектам па разьвіцьцю сучаснай ўкраінскай мовы і слэнгу, куды пішуць звычайныя карыстальнікі. Асноўнымі крытэрамі выбару зьяўляюцца папулярнасьць слова і яго сацыяльная значнасьць.
У Беларусі сёлета выкладчыкі грамадзкіх курсаў беларускай мовы назвалі словам году «вышымайку».
Тэлеканал «Дождж» назваў словам году ў Расеі «Крымнаш».
Стваральнікі Оксфардзкага слоўніка, якія і запачаткавалі моду на вызначэньне «словаў году», абралі сёлета дзеяслоў «to vape», што значыць «курыць электронную цыгарэту».
Летась у Оксфардзе абралі словам году «Selfie», што азначае фатаграфію самога сябе.
А якое слова стала «словам году» для вас?
