Лінкі ўнівэрсальнага доступу

Украінская ўлада фінансава падтрымлівае дзеячаў групоўкі «ЛНР», якія фармальна застаюцца грамадзянамі Ўкраіны. Пра гэта заявіў старшыня Луганскай аблдзяржадміністрацыі Генадзь Маскаль, інфармуе яго сайт.

«Нягледзячы на катастрафічны недахоп сродкаў у дзяржбюджэце і абвешчаную ўрадам жорсткую эканомію, Украіна працягвае фінансаваць тэрарыстаў ЛНР, выплачваючы ім пэнсіі», — сьцьвярджае Маскаль.

«Вялікая колькасць самазванцаў самаабвешчанай рэспублікі, якія працуюць у так званых марыянэткавых міністэрствах і прадстаўніцтвах на акупаванай баевікамі частцы Луганскай вобласьці, здолелі зарэгістравацца на кантраляванай Украінай тэрыторыі і атрымліваюць адсюль пэнсіі. А паралельна кіруюць тэрарыстамі, абстрэльваюць мірных жыхароў Луганшчыны, зьнішчаюць прыватнае жыльлё, сацыяльныя аб’екты і інфраструктуру», — заявіў ён.

У паведамленьні на сваім сайце старшыня Луганскай абласной адміністрацыі прывёў 14 прозьвішчаў «чыноўнікаў» групоўкі «ЛНР», якіх, паводле яго слоў, далей фінансуе Украіна. У той жа час Маскаль дадаў, што «на самай справе іх значна больш».

«І ніякіх крокаў для спыненьня іх фінансаваньня Украіна чамусьці ня робіць», — адзначыў чыноўнік.

Сёньня ў зоне правядзеньня антытэрарыстычнай апэрацыі працуе сакратар Рады нацыянальнай бясьпекі і абароны Ўкраіны Аляксандар Турчынаў. Па дадзеных прэс-службы РНБА, Турчынаў плянуе надаць увагу «пытаньню ўвядзеньня строгага рэжыму кантролю перамяшчэньня грамадзян і грузаў у зоне АТА».

Паказаць камэнтары

XS
SM
MD
LG