Аўтар дакумэнтальнай стужкі Валер Мазынскі да гэтага ўжо зьняў два фільмы пра антысавецкіх падпольшчыкаў — «Глыбоцкую змову» пра Саюз беларускіх патрыётаў, а яшчэ раней — «Як пошуг маланкі» — пра Расціслава Лапіцкага. Абедзьве гэтыя гісторыі першым знайшоў і апісаў Міхась Чарняўскі.
Дакумэнтальны фільм «І выберу Радзіму» апавядае пра Міхася Чарняўскага яго ўласнымі словамі, а таксама ягоных родных, сяброў і паплечнікаў.
«Ягоны бацька пхаў пальцам у грудзі малому, кажучы: „Ты — беларус! Паўтары: БЕЛАРУС!“. Ён адказаў: „Белалус“, — яшчэ не вымаўляючы „р“. І гэта быў першы ўрок, каб ведаў, хто такі. Чалавек, які ўвасобіў Другое беларускае адраджэньне, стаўшы яго неадменнаю часткаю — адкрывальнікам мінулага Радзімы, заснавальнікам нацыянальнага руху. Ён быў дысыдэнтам, яго перасьледавалі за савецкім і лукашэнкаўскім часам» — гаворыцца ў анатацыі да фільму.
Белсат, рэж. Валерый Мазынскі, 2014 г., Беларусь