ПАДЗЕІ ДНЯ
У офісе Партыі БНФ (вул. Чарнышэўскага, 3) адбудзецца сьвяточны канцэрт-прэзэнтацыя новага дыска «Беларускі хрысьціянскі хіт — 7. Люблю Беларусь».
У канцэрце ўдзельнічаюць: група «Laudans», Віктар Козел («Tesaurus»), Андрэй Мельнікаў. Пачатак а 17.00.
У Мармуровай залі Берасьцейскай філярмоніі (вул. Арджанікідзэ 14) адбудзецца калядны баль. Пачатак а 19.00. Дрэс-код: вячэрнія ўборы і маскі.
ГЭТЫ ДЗЕНЬ У ГІСТОРЫІ
1918 — Рада БНР пераехала зь Вільні ў Горадню.
1932 — у СССР уводзіцца пашпартная сыстэма і абавязковая прапіска па месцы жыхарства. Пасьля кастрычніцкага перавароту 1917 году пашпарты ў Савецкім Саюзе былі адмененыя як адна з праяваў царскай адсталасьці і дэспатызму.
1974 — пачала езьдзіць электрычка Менск-Барысаў.
1991 — Беларусь усталявала дыпляматычныя адносіны з Украінай.
У гэты дзень нарадзіліся:
1595 — Багдан Хмяльніцкі, украінскі гетман.
1822 — Луі Пастэр, францускі хімік і бактэрыёляг, заснавальнік сучаснай мікрабіялёгіі ды імуналёгіі. Менавіта Пастэр прыдумаў тое, што цяпер называюць пастэрызацыяй.
1836 — Валеры Урублеўскі, адзін з кіраўнікоў паўстаньня 1863-64.
1923 — паэт Анатоль Вялюгін.
«З усіх сабораў ёсьць сабор,
дзе згодзен я маліцца;
у сьпелым леце, сьпелы бор,
зьвіняць твае званіцы.
У душным водары палян,
дзе маладосьць хадзіла,
багун, дурнічнік, дурнап’ян
разьдзьмулі ўсе кадзіла.»
Анатоль Вялюгін
У гэты дзень памерлі:
1633 — Мялецій Сматрыцкі, царкоўны і грамадзка-палітычны дзяяч, пісьменьнік-палеміст.
2010 — паэтка і журналістка Тацяна Сапач.
«Ня намі закладзены
гэты маркотны парадак:
на мове чужой гаворыць родны народ,
чужыя народы гавораць на родных мовах.
Але нам ня дадзена іншай Радзімы, калі
блакітам яе і самотай
спатолены погляд.
І можа таму, што жыцьцё,
нібы міг, кароткае,
на беднай,
на вечнай Радзіме
жыве чалавек.»
Тацяна Сапач
З КАЛЕНДАРА БАХАРЭВІЧА