Лінкі ўнівэрсальнага доступу

Рух «За Свабоду»: Дэвальвацыя — найменшае зло


Усталяваць рэальны рынкавы курс рубля і правесьці дэнамінацыю — такія захады прапануе зрабіць рух «За Свабоду», каб прадухіліць каляпс беларускай эканомікі на фоне падзеньня курсу расейскага рубля.

Штучнае стрымліваньне курсу беларускага рубля, чым займаюцца нашы чыноўнікі, шкодзіць беларускай эканоміцы, лічыць намесьнік старшыні арганізацыі Юры Губарэвіч.

Дэвальвацыя ўсё роўна непазьбежная. У адваротным выпадку будуць змарнаваныя вялікія крэдытныя рэсурсы на падтрыманьне штучнага курсу беларускага рубля

«Дэвальвацыя ўсё роўна непазьбежная. У адваротным выпадку будуць змарнаваныя вялікія крэдытныя рэсурсы на падтрыманьне штучнага курсу беларускага рубля. Курс павінен быць вольным, фармавацца на падставе рынкавай сытуацыі, якая дазволіць стабілізаваць сытуацыю і атрымаць рэальны курс рубля. Магчыма, што такая мера пацягне за сабой дэвальвацыю, якая ў гэтай сытуацыі будзе найменшым злом. Пасьля гэтага магчыма, спатрэбіцца дэнамінацыя. Але ў далейшым гэта прывядзе да аздараўленьня беларускай эканомікі. Вядома, аднаго вольнага курса рубля недастаткова для гэтага. Таксама павінна адбыцца дывэрсыфікацыя рынкаў збыту, адмова ад супрацы выключна з Эўразійскім саюзам, і ў пэрспэктыве — выхад зь яго і арыентацыя на рынкі краінаў Эўразьвязу», — кажа Юры Губарэвіч.

Юрась Губарэвіч

Юрась Губарэвіч

18 сьнежня «Рух за Свабоду», які ўзначальвае былы кандыдат у прэзыдэнты Аляксандар Мілінкевіч, распаўсюдзіў заяву, у якой заклікае прыняць неадкладныя захады па ратаваньні беларускай эканомікі.

Рух лічыць, што неабходныя гнуткі, рэгуляваны рынкам курс беларускага рубля і пачатак сыстэмных рэформаў з арыентацыяй на мадэрнізацыю прадпрыемстваў пры дапамозе замежных інвэстыцыяў і на дывэрсыфікацыю экспарту. Пасьля стабілізацыі беларускага рубля варта правесьці грашовую рэформу«, — сьцьвярджаецца ў заяве, якую кіраўніцтва руху «За Свабоду» падрыхтавала пасьля кансультацыяў з эканамістамі.

XS
SM
MD
LG