Паводле маці і бацькі Жызьнеўскага, Ніны і Міхаіла Жызьнеўскіх, якія прыехалі ў Кіеў зь Беларусі, на Радзіме яны адчуваюць моцны ціск — як з боку органаў улады, гэтак і ад суседзяў, якія вераць «антымайданаўскай» прапагандзе.
Так, калі Ніна Жызьнеўская была ў шпіталі, іншыя пацыенткі называлі яе «маці бандыта», абвінавачвалі, што яе сын прадаўся Амэрыцы і гэтак далей. Бацькі загінулага зьвярнуліся да прэзыдэнта Ўкраіны Пятра Парашэнкі з заклікам зрабіць выключэньне і даць іх сыну званьне Героя Украіны — яны лічаць, што пасьля гэтага зьдзекаў з боку суседзяў будзе менш.
Акрамя таго, сёньня на вуліцы Грушэўскага ў Кіеве, непадалёк ад месца, дзе загінуў Міхаіл Жызьнеўскі, была усталявана сымбалічная дошка ягонае памяці.
Раней прэзыдэнт Украіны Пятро Парашэнка падпісаў указ аб прысваеньні 99 героям Нябеснай сотні званьня Героя Ўкраіны, аднак Жызьнеўскаму быў прысвоены ордэн Героя Нябеснай сотні. Прэзыдэнт удакладніў, што паводле працэдуры званьне Героя Ўкраіны немагчыма прысвоіць тром замежнікам, якія загінулі падчас Рэвалюцыі годнасьці.
