Сьвятлана Алексіевіч і Захар Прылепін — фаварыты чытацкага выбару найбуйнейшай расейскай літаратурнай прэміі «Вялікая кніга».
Расейскія чытачы аддалі перавагу беларускай кнізе «Час сэканд-хэнд» — паведамляе сайт прэміі.
Прэміяльны фонд прэміі «Вялікая кніга» складае 6,1 млн расейскіх рублёў.
Сьвятлана Алексіевіч паведаміла Свабодзе з Масквы, што вельмі некамфортна пачуваецца ў шорт-лісьце разам з Захарам Прылепіным.
«Адчуваю сябе вельмі, вельмі некамфортна. Справа ў тым, што гэты чалавек абсалютна іншых перакананьняў. Я лічу, што пісьменьнік, які прапаведуе вайну, абараняе яе і яму гэта падабаецца, — гэта не пісьменьнік, не прафэсіянал. Гэта чалавек нейкай іншай прафэсіі».
24 лістапада 2014 году скончылася традыцыйнае чытацкае галасаваньне «Вялікая кніга», паводле якога першае месца атрымала Сьвятлана Алексіевіч. Захар Прылепін — на другім.
«У народным галасаваньні я перамагла Захара Прылепіна. Гэта мяне пераканала ў тым, што ня ўсе тут зьехалі з глузду і ня ўсіх захапіла мілітарысцкая гістэрыя. Мне здаецца, што людзі самі зьбянтэжаныя і разгубленыя. Ёсьць нармальныя людзі. Народнае галасаваньне мяне вельмі парадавала. Нават не з-за таго, што я перамагла, а з-за таго, што не атрымаў першае месца Захар Прылепін, які вельмі нахабна ішоў да перамогі».
Разам з тым Сьвятлана Алексіевіч кажа, што ня мае спадзеваў на перамогу ў конкурсе — на яе думку, журы можа не ўлічыць вынік народнага галасаваньня і зрабіць выбар на карысьць Захара Прылепіна:
«У мяне няма ўпэўненасьці, што я перамагу. Таму што ў агульным стане расейскае грамадзтва сёньня вельмі нечаканае, вельмі агрэсіўнае. Увогуле, ёсьць рэваншысцкі комплекс у расейскага грамадзтва».
25 лістапада расейская літаратурная акадэмія назаве ляўрэатаў дзявятага сэзону Нацыянальнай літаратурнай прэміі «Вялікая кніга». Тры ляўрэаты прэміі будуць вызначаныя непасрэдна ў часе цырымоніі спэцыяльнай камісіяй, у якую ўваходзяць 120 чалавек.
У гэтым сэзоне на званьне ляўрэатаў прэтэндуюць 9 твораў, сярод якіх «Час сэканд хэнд» Сьвятланы Алексіевіч, «Обитель» Захара Прылепіна і «Теллурия» Ўладзімера Сарокіна.
