Пра гэта Пятро Парашэнка заявіў на сумеснай з прэзыдэнтам Літвы Даляй Грыбаўскайце прэсавай канфэрэнцыі ў Кіеве па выніках двухбаковых перамоваў:
«Рашэньне аб уступленьні або неўступленьні ў НАТО — гэта выключная кампэтэнцыя ўкраінскага народа», — падкрэсьліў Парашэнка.
Паводле яго слоў, калі Ўкраіна будзе адказваць патрабаваньням НАТО, украінскі народ на рэфэрэндуме зможа вырашыць, ўступаць альбо не ступаць ў НАТО.
Уступленьне краіны ў НАТО не патрабуе згоды яе насельніцтва. З 28 краін-членаў НАТО толькі дзьве — Вугоршчына і Славенія — праводзілі непасрэдна напярэдадні ўступленьня рэфэрэндум аб гэтым.
У канцы мінулага тыдня пяць партый, якія прайшлі ў новаабраную Вярхоўную Раду, падпісалі кааліцыйную дамову, у якую ўнесьлі пункт аб «адмены пазаблёкавага статусу Ўкраіны, аднаўленьне палітычнага курсу на інтэграцыю ў эўраатлянтычную прасторы і набыцьці сяброўства ў Арганізацыі Паўночнаатлянтычнай дамовы».
Украіна афіцыйна адмовілася ад папярэдняга курсу на ўступленьне ў НАТО ў 2010 годзе, адразу пасьля прыходу да ўлады тагачаснага прэзыдэнта Віктара Януковіча. У 2004 годзе Януковіч, у той час прэм’ер-міністар Украіны, распрацаваў плян ўступленьня Ўкраіны ў НАТО да 2008 года.
Тады, пры прэзыдэнце Леанідзе Кучме, пад кіраўніцтвам Віктара Януковіча была распрацаваная Стратэгія эканамічнага і сацыяльнага развіцьця Ўкраіны «Шляхам эўрапейскай інтэграцыі» на 2004-2015 гады, якая прадугледжвала, што «Ўкраіна, ажыцьцяўляючы абвешчаны зьнешнепалітычны курс на эўраатлянтычную інтэграцыю, ставіць перад сабой мэту — трапіць у бліжэйшую хвалю пашырэньня НАТО». План Януковіча не прадугледжваў ніякіх рэфэрэндумаў.
У НАТО пацьвярджаюць, што пазыцыя саюзу застаецца нязьменнай: Украіна мае права на ўступленьне, калі Кіеў выкажа жаданьне далучыцца да НАТО і выканае неабходныя ўмовы. У той жа час Расея патрабуе «гарантый неўступленьня Ўкраіны ў НАТО».