Лінкі ўнівэрсальнага доступу

Парашэнка распарадзіўся спыніць дзяржаўнае фінансаваньне сэпаратысцкіх тэрыторыяў. Пуцін назваў гэта «вялікай памылкай»


Прэзыдэнт Расеі Уладзімір Пуцін назваў «вялікай памылкай» указ украінскага лідэра Пятра Парашэнкі аб спыненьні дзяржаўнага фінансаваньня тэрыторый на ўсходзе Ўкраіны, якія знаходзяцца пад кантролем сэпаратыстаў.

На сваёй заключнай прэс-канфэрэнцыі ў Брызбене (Аўстралія), дзе праходзіў саміт «вялікай дваццаткі», Пуцін заявіў, што ўкраінскія ўлады «ўласнай рукой адразаюць гэтыя рэгіёны», паведамляе Бі-Бі-Сі.

Пуцін у Аўстраліі

Пуцін у Аўстраліі

У суботу Парашэнка даў даручэньне дзяржаўным ведамствам на працягу месяца спыніць абслугоўваньне банкаўскіх рахункаў прадпрыемстваў і насельніцтва ў зоне спэцапэрацыі на ўсходзе Ўкраіны. Адначасова павінна быць спынена дзейнасьць дзяржаўных прадпрыемстваў, устаноў і арганізацый на тых тэрыторыях Данецкай і Луганскай абласьцей, якія знаходзяцца пад кантролем сэпаратыстаў.

Напярэдадні паведамлялася, што прэзыдэнт Украіны Пятро Парашэнка 14 лістапада падпісаў указ аб увядзеньні ў дзеяньне рашэньня Рады нацыянальнай бясьпекі і абароны «Аб захадах па стабілізацыі сацыяльна-эканамічнай сытуацыі ў Данецкай і Луганскай абласьцях». Дакумэнт прадугледжвае, у прыватнасьці, «неадкладна» адмяніць прыняты нядаўна закон «Аб асаблівым парадку мясцовага самакіраваньня ў асобных раёнах Данецкай і Луганскай абласьцей». Такі парадак прапаноўваўся ўрадам у сувязі зь пярэчаньнямі Кіева супраць выбараў у органы ўлады самаабвешчаных Данецкай і Луганскай «народных рэспублік». Нягледзячы на пазыцыю Кіева, на тэрыторыях, падкантрольных сэпаратыстам, выбары былі праведзеныя 2 лістапада.

Лідэр ДНР Аляксандар Захарчанка

Лідэр ДНР Аляксандар Захарчанка

Ва ўказе прэзыдэнта Парашэнкі, падпісаным 14 лістапада, адзначаецца, што ўсе органы, сфармаваныя па выніках незаконных выбараў, дзейнічаюць насуперак Канстытуцыі і законам Украіны. Ураду даручаецца тэрмінова наладзіць даставы гуманітарнай дапамогі Данецкай і Луганскай абласьцям. Пры гэтым на тых грузах і вырабах павінна быць прастаўлена маркіроўка ў выглядзе дзяржаўнай украінскай сымболікі.

Паказаць камэнтары

XS
SM
MD
LG