Лінкі ўнівэрсальнага доступу

У Бабруйску працаўнікі абвясьцілі галадоўку


Звольненыя з бабруйскага заводу трактарных дэталяў і агрэгатаў сябры Свабоднага прафсаюзу Беларускага распачалі галадоўку.

Пра пачатак сваёй акцыі пратэсту чацьвёра яе ўдзельнікаў абвясьцілі 5 лістапада а 10 гадзіне раніцы ў будынку Бабруйскага гарвыканкаму. У ім актывісты зьбіраюцца правесьці першы дзень галадоўкі.

Прафсаюзьнікі заяўляюць, што пакуль галадоўку будуць трымаць двое сутак. Ёй яны прыцягваюць увагу грамадзкасьці да перасьледу сяброў Свабоднага прафсаюзу Беларускага на заводзе трактарных дэталяў і агрэгатаў.

«Мы хочам, каб нашы праблемы былі пачутыя ўладай. Нам ніхто не надае ўвагі, куды мы ні зьвяртаемся. Таму мы вырашылі правесьці такую акцыю пратэсту», — заявіў адзін з удзельнікаў галадоўкі Алег Шаўчэнка.

На галадоўку прафсаюзьнікі наважыліся пасьля таго, як не дачакаліся адказу ад Аляксандра Лукашэнкі, да якога зьвярталіся з адкрытым лістом. У ім прасілі кіраўніка дзяржавы разабрацца зь незаконнымі, як яны лічаць, звальненьнямі сяброў Свабоднага прафсаюзу Беларускага.

У лісьце прэзыдэнту скаржнікі даводзілі, што з заводу звальняюць высокакваліфікаваных спэцыялістаў, шкодзячы вытворчасьці. Яны вінавацяць у сваім звальненьні кіраўніка прадпрыемства Аляксандра Аграновіча, які, на іхную думку, «абвясьціў вайну свабоднаму прафсаюзу».

Сёлета ў сакавіку сябры Свабоднага прафсаюзу Беларускага ўжо праводзілі падобную трохдзённую галадоўку пратэсту, але свайго не дамагліся. Адміністрацыя прадпрыемства па яе сканчэньні пачала звальняць яе ўдзельнікаў.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG