Лінкі ўнівэрсальнага доступу

У Беларусі магчыма выканалі трэці сьмяротны прысуд за год


Расстраляны Аляксандар Груноў, асуджаны да сьмяротнага пакараньня за забойства студэнткі Натальлі Емяльянчыкавай.

Пра выкананьне прысуду Праваабарончаму цэнтру «Вясна» паведаміла маці асуджанага Вольга Грунова.

Вольга Грунова атрымала пасылку з адзеньнем сына, якое было на ім у камэры сьмяротнікаў на «Валадарцы».

3 лістапада стала вядома, што Аляксандру Грунову адмоўлена ў памілаваньні.

Праваабаронца Андрэй Палуда лічыць: ёсьць вялікая верагоднасьць, што прысуд прыведзены ў выкананьне:

Андрэй Палуда. Фота spring96.org
Андрэй Палуда. Фота spring96.org

«Тэма сьмяротнага пакараньня і выкананьня сьмяротных прысудаў застаецца пад заслонай сакрэтнасьці. Інфармацыю даводзіцца здабываць па ўскосных прыкметах. Вельмі падобна да таго, што сьмяротны прысуд у дачыненьні да Аляксандра Грунова выкананы. Раней мы атрымалі інфармацыю, што справа Аляксандра Грунова прыйшла ў Гомельскі абласны суд з пазнакаю, што ў прымяненьні памілаваньня ў дачыненьні да яго адмоўлена і што ўсе меры па абскарджваньні прысуду на нацыянальным узроўні ім вычарпаныя.

Гэта было яшчэ 13 кастрычніка, то бок ужо дастаткова даўно. Улічваючы, што прыйшлі маці і ягоныя рэчы, мы можам сказаць, што гэта так і ёсьць.

Маці і адвакат пойдуць у абласны суд заўтра, каб атрымаць афіцыйныя паведамленьні, дакумэнты, пасьля атрыманьня якіх яна можа зьвярнуцца ў ЗАГС, каб атрымаць пасьведчаньне аб сьмерці. Маці ў цяжкім псыхалягічным стане, таму зараз пайсьці не гатовая.

Нас турбуе лёс яшчэ аднаго асуджанага — Эдуарда Лыкава. Ягоная справа таксама знаходзілася на разглядзе аб памілаваньні. Практыка ў нас такая, што расстрэльваюць не па адным. Так было і зь Юзапчуком і Жуком у 2010 годзе, і з Кавалёвым і Канавалавым.

Мы адсочваем ягоны лёс, але гэта даволі складана, бо ў яго сваякоў у Беларусі няма, дзеці жывуць за мяжою. Ён лічыцца чалавекам бяз пэўнага месца жыхарства».

Сёлета ў Беларусі ўжо былі выкананыя два сьмяротныя прысуды: у дачыненьні да 23-гадовага Паўла Селюна і 45-гадовага Рыгора Юзапчука. 54-гадовы Эдуард Лыкаў, паводле інфармацыі праваабаронцаў, чакае выкананьня прысуду.

Беларусь застаецца адзінай краінай у Эўропе, дзе сьмяротнае пакараньне ўсталявана заканадаўча і прыводзіцца ў выкананьне. Расея прытрымліваецца мараторыю на сьмяротнае пакараньне з 1997 году.

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG