Лінкі ўнівэрсальнага доступу

Старшыня Аб’яднанай грамадзянскай партыі Анатоль Лябедзька пракамэнтаваў карэспандэнту Свабоды падаўжэньне санкцыяў ЭЗ супраць афіцыйнага Менску.

Анатоль Лябедзька ня лічыць, што адносна Беларусі існуюць санкцыі ЭЗ. Паводле палітыка, гэта кропкавыя абмежаваньні для тых чыноўнікаў, якія парушаюць Канстытуцыю і міжнародныя абавязкі Беларусі.

«Гэта істотна, бо Беларусь і чыноўнік — гэта розныя рэчы. Санкцыі і кропкавыя абмежаваньні — гэта розныя рэчы.

Гэта быў і мой прагноз, што сьпіс застанецца. Хоць яшчэ тыдні два таму ў МЗС беларускія чыноўнікі і дыпляматы на ўзроўні гістэрыі даводзілі, ледзь не патрабавалі ад дыпляматаў іншых краін, каб гэты сьпіс скасавалі.

Тое, што сьпіс застанецца, гэта азначае адно: што праблемы ў стасунках з Брусэлем, з цывілізаванай міжнароднай супольнасьцю ў Беларусі застаюцца. Для таго каб ісьці наперад, недастаткова рыторыкі, недастаткова словаў, патрэбны рэальныя дзеяньні. Гэта азначае, што патрэбна вырашаць праблему палітвязьняў, трэба вырашаць пытаньне свабодных і сумленных выбараў, гэта новая якасьць сытуацыі. І тады сьпіс зьнікне сам па сабе без усялякай гістэрыкі, бяз просьбаў і патрабаваньняў беларускіх чыноўнікаў.

Магчыма, з гэтага сьпісу нехта і зьнікне, але сам сьпіс як доказ таго, што ў нас ёсьць праблемы і іх трэба вырашаць, застанецца.

Больш за тое, я прыхільнік ня толькі брусэльскага сьпісу. Я больш выступаю за тое, каб быў беларускі сьпіс. Каб праваабарончыя арганізацыі краіны такі сьпіс мелі па выніках кожнага году. Каб была такая дошка ганьбы для тых, хто проста злоўжывае паўнамоцтвамі і мажлівасьцямі, якія ў яго ёсьць, для таго каб прынізіць, зганьбіць, зьнішчыць людзей, якія ня самыя горшыя ў Беларусі».

Лябедзька не выключае, што з гэтага сьпісу можа зьнікнуць прозьвішча міністра замежных спраў Уладзімера Макея альбо некага яшчэ.

«Нейкая дэманстрацыя зрухаў павінна быць, што гэта жывы сьпіс, што ён можа мяняцца ў адзін бок ці ў другі. Я прагназую, што такі мяккі знак павінен быць пададзены Брусэлем Менску. Але гэта не азначае, што тое, што сёньня ёсьць, павінна задаволіць Брусэль ці міжнародную супольнасьць цалкам».

Паказаць камэнтары

XS
SM
MD
LG