Лінкі ўнівэрсальнага доступу

Бабруйскую авіябазу расейцы ператвораць у «авіябазу падскоку» супроць НАТО, — Алесін


«Су-27» на парадзе перамогі ў Маскве
«Су-27» на парадзе перамогі ў Маскве

У Менску прайшло сумеснае паседжаньне калегіяў Міністэрстваў абароны Беларусі і Расеі, у якім узяў удзел расейскі міністар абароны Сяргей Шайгу. Ці зьвязаны гэты візыт з крытыкай у галіне вайсковага супрацоўніцтва, якую раней выказаў Аляксандар Лукашэнка на адрас Расеі?

На авіябазе ў Бабруйску расейскія самалёты зьявяцца не ў 2016 годзе, а ўжо ў наступным. Гэта вынікае з заяваў у Менску міністра абароны Расеі генэрала арміі Сяргея Шайгу.

Сяргей Шайгу
Сяргей Шайгу

«На наступны год у нас на аэрадроме ў Бабруйску стануць на баявое дзяжурства 12 баявых самалётаў „СУ-27“, 2 вучэбныя самалёты „Су-27“ і зьвяно верталётаў з чатырох адзінак — гэта авіяцыя падтрымкі», — сказаў Сяргей Шайгу пасьля ўдзелу ў сумеснай калегіі абаронных ведамстваў Беларусі і Расеі.

Неабходнасьць зьяўленьня расейскіх самалётаў у Бабруйску Сяргей Шайгу патлумачыў «неабходнасьцю супрацьстаяць новаму спэктру выклікаў і пагрозаў».

Раней часам зьяўленьня яшчэ адной расейскай авіябазы — у Бабруйску — называлі 2016 год.

Таксама Сяргей Шайгу паведаміў у Менску, што ўжо ў 2014 годзе Расея завершыць пастаўку ў Беларусь 4 ракетных комплексаў С-300. Расейскі міністар абароны запэўніў, што гэтыя ракеты будуць перададзеныя Беларусі бясплатна.

Сяргей Шайгу ў Менску шмат казаў пра небясьпеку «каляровых рэвалюцыяў».

Чым можна патлумачыць шчодрасьць расейскага кіраўніцтва што да паставак зброі Беларусі?

Аляксандар Алесін
Аляксандар Алесін

Незалежны вайсковы аглядальнік Аляксандар Алесін зьвязвае візыт Сяргея Шайгу ў Менск і абяцаньні паставіць комплексы «С-300» з той крытыкай, якую нядаўна выказаў на адрас Расеі кіраўнік Беларусі Аляксандар Лукашэнка.

«Лукашэнка прасіў самалёты — іх далі, але ня ў наша карыстаньне, а дзеля сваёй новай авіябазы. А ракеты „С-300“ даюць як дадатак, каб прыкрываць гэтую базу з паветра», — мяркуе Аляксандар Алесін.

«Усё ж вайскова-палітычнае кіраўніцтва Расеі насьцярожыла рэакцыя вялікай часткі насельніцтва Беларусі на яшчэ адну расейскую вайсковую базу. Мне падаецца, што Шайгу прыехаў, каб яшчэ больш пераканаць беларускае кіраўніцтва ў тым, што база тут павінна быць. Гэта свайго роду рэжым ціску, лабіраваньня, каб Беларусь не зацягвала гэты працэс. Памятаеце, Лукашэнка на апошняй прэсавай канфэрэнцыі ўскосна намякнуў, што ў нас тут ёсьць шмат пілётаў, а самалётаў няма. А замест гэтага нам прапаноўваюць новую авіябазу. Таму мяркую: гэты выступ Лукашэнкі, які ня быў асабліва прыемны для расейскага кіраўніцтва, таксама прымусіў Пуціна паслаць сюды свайго міністра абароны».

Вядома, у Расеі не найлепшае эканамічнае становішча цяпер, але са зброяй, асабліва ня самай новай, у іх добра

Сяргей Шайгу паабяцаў бясплатную пастаўку Беларусі ракетных комплексаў «С-300». Аляксандар Алесін мяркуе, што гаворка ідзе пра тыя комплексы, якія раней ахоўвалі паветраную прастору над Масквой і былі замененыя на больш сучасныя. Але ці можа на ўзбраеньні беларускага войска зьявіцца больш сучасная расейская зброя?

«Магчыма, што будзе разгледжана пытаньне аб паскарэньні пастаўкі комплексаў „Іскандэр Э“. Нагадаю, Лукашэнка ў сваім выступе крыўдзіўся, што менавіта „Іскандэраў“ яму не пастаўляюць. Вядома, у Расеі не найлепшае эканамічнае становішча цяпер, але са зброяй, асабліва ня самай новай, у іх добра. Мяркую, дапамогуць».

Авіябазу ў Бабруйску і ракеты «С-300», якія Расея перадасьць Беларусі, Аляксандар Алесін лічыць найперш пагрозай для сілаў НАТО, якія наблізіліся да Беларусі. Аглядальнік не выключае, што на авіябазе ў Бабруйску пасьля «СУ-27» зьявяцца і самалёты стратэгічнай авіяцыі:

«Бэтонныя палосы на бабруйскім аэрадроме дазваляюць прымаць і стратэгічную авіяцыю. То бок гэты аэрадром можа стаць і гэтак званым „аэрадромам падскоку“ для стратэгічнай расейскай авіяцыі на выпадак пэрыяду пагрозаў — непасрэдна перад вайной».

Ігар Лосік Кацярына Андрэева Ірына Слаўнікава Марына Золатава Андрэй Кузьнечык
XS
SM
MD
LG