Як паведамляе Польскае радыё, працэдуру дэпартацыі пачаў мазавецкі ваявода пасьля адпаведнага звароту Агенцтва ўнутранай бясьпекі. У Сьвірыдава забяруць дазвол на часовае знаходжаньне ў Польшчы.
Паводле польскіх СМІ, карэспандэнта РИА Новости Леаніда Сьвірыдава падазраюць у шпіянажы, а таксама ў дзейнасьці, якая выходзіць за рамкі абавязкаў карэспандэнта. У прыватнасьці, ён арганізоўваў паездкі польскіх журналістаў у Расею.
МЗС Польшчы паведамляе, што ў Сьвірыдава забралі акрэдытацыю з 24 кастрычніка.
Упершыню Леанід Сьвірыдаў атрымаў журналісцкую акрэдытацыю ў польскім МЗС у 1998 годзе, з 2003 году стала жыве і працуе ў Польшчы. У 2006 годзе Сьвірыдаву адмовілі ў акрэдытацыі ў Чэхіі, адна зь мясцовых газэтаў зьвінаваціла яго ў шпіянажы.
Раней Леанід Сьвірыдаў працаваў у Менску карэспандэнтам тэлеканалу РТР і меў беларускае грамадзянства.
