Лінкі ўнівэрсальнага доступу

Расейская валюта працягвае біць антырэкорды. Упершыню ў гісторыі эўра дасягнуў 54 рублёў, сьведчаць дадзеныя Маскоўскай біржы. Ці адбіваецца падзеньне расейскага рубля на фінансавым стане прадпрыемстваў і жыхароў Беларусі?

Гэта здарылася сёньня аб 11-й гадзіне маскоўскага часу, хоць паводле стану на 10:30 курс эўра складаў яшчэ 53 рублі 88 капеек. Адначасова і курс даляра дасягнуў 42 рублёў 45 капеек.

Рэкордны абвал рубля адбываецца з-за таго, што санкцыі супраць Расеі, уведзеныя з-за агрэсіўнай палітыкі Пуціна ў дачыненьні да Ўкраіны, перакрылі расейскім кампаніям доступ да заходняга капіталу. Таксама вельмі нэгатыўна на рубель уплывае моцнае падзеньне цэнаў нафты.

Леў Марголін

Леў Марголін

Ці адбіваецца падзеньне расейскага рубля на фінансавым стане прадпрыемстваў і жыхароў Беларусі? Адказваючы на гэтае пытаньне Свабоды, эканаміст Леў Марголін адзначае, што беларускія вытворцы вельмі моцна зьвязаныя з расейскім рынкам:

«Але страты нясуць толькі тыя беларускія прадпрыемствы, якія вядуць разьлікі са сваімі партнэрамі ў расейскіх рублях. А тыя, у каго цэны на тавары ў кантрактах зафіксаваныя ў свабодна канвэртавальнай валюце, невыгодаў ня маюць. Больш за тое, калі сыравіну яны атрымліваюць з Расеі па расейскіх рублях, дык ад абвалу расейскага рубля яны толькі выйграюць.

Я думаю, што бальшыня нашых прадпрыемстваў у сваіх разьліках гэта ўлічвае. Цяпер прадпрыемствы сталі гэткай дынамічнай сфэрай, дзе сытуацыя на валютных рынках пільна адсочваецца. І гэта зразумела, бо вытворцы стараюцца пазьбегнуць валютных стратаў. А сытуацыя з расейскім рублём цягнецца ўжо ня першы месяц. Тэндэнцыі вызначыліся. І я мяркую, што бальшыня нашых прадпрыемстваў ужо вызначыліся з адпаведнымі захадамі.

Што тычыцца захаваньня беларусамі ўласных грошай у банках, то людзі, якія трымаюць іх у далярах, эўра ці беларускіх рублях, нічога ад падзеяў у Расеі ня трацяць. А вось тыя, хто даверыўся расейскаму рублю, нясуць страты. Я думаю, што найперш гэта дробныя прадпрымальнікі, якія вязуць свае тавары ў Беларусь з Расеі.

Стаўка па дэпазытах у беларускіх рублях пакуль вышэйшая і за ўзровень інфляцыі, і за ўзровень дэвальвацыі беларускага рубля. То бок — вось такі прыклад: на пачатку году я меў сродкі, каб набыць тысячу даляраў. Але я гэтага не зрабіў, а аднёс грошы ў банк і паклаў іх там на дэпазыт у беларускіх рублях. Дык сёньня я магу купіць за гэтыя сродкі нават крыху болей за тысячу даляраў».

Раней намесьнік старшыні праўленьня Нацыянальнага банку Беларусі Сяргей Дубкоў, адказваючы Свабодзе, адзначаў:

«Насельніцтва Беларусі традыцыйна трымае свае ашчаджэньні ў банках у далярах і беларускіх рублях. Доля ўкладаў у расейскіх рублях вельмі нязначная, яна складае менш за 5 працэнтаў ад усёй сумы ўкладаў. Расейскі рубель ніколі ня быў прыярытэтам для беларускіх укладчыкаў.

Зь іншага боку, Расейская Фэдэрацыя — наш асноўны гандлёвы партнэр, а расейскі рубель разам з далярам і эўра знаходзіцца ў адным кошыку, да якога прывязаны беларускі рубель. Таму для нас зьмяненьне расейскага рубля вельмі важнае. Мы шмат туды прадаём і шмат там купляем.

Зразумела, што са зьмяненьнем курсу расейскага рубля пэўныя зьмяненьні адбываюцца і ў нас, але яны нязначныя. Мы не павінны перакладаць адказнасьць за сытуацыю ў нашых фінансах, у нашай эканоміцы на расейскі рубель. Мы самі павінны лепш працаваць. Ня трэба шукаць бервяно ў воку суседа, а трэба самім рабіць так, каб ніякія зьмяненьні істотна не адбіваліся на беларускіх фінансах».

Ад пачатку году расейскі рубель патаньнеў ужо амаль на 30%.

Максымальны працэнт па ўкладах у расейскіх рублях у банках Беларусі — 9,5% гадавых.

XS
SM
MD
LG