У забойстве абвінавачваецца 39-гадовы сабутэльнік загіблага, паведаміла агенцтву «Інтэрфакс» старшы памочнік пракурора Менскай вобласьці Ларыса Пархімовіч.
«39-гадовы жыхар Мар’інай Горкі абвінавачваецца органамі сьледзтва ў наўмысным забойстве вайсковага пэнсіянэра, зь якім у адзін зь дзён траўня бягучага года расьпіваў сьпіртныя напоі па месцы жыхарства пацярпелага. У ходзе сваркі, якая раптоўна ўзьнікла ў выніку абмеркаваньня канфлікту ва Ўкраіне, абвінавачаны нанёс пажылому мужчыну каля 12 удараў, прычыніўшы цяжкія цялесныя пашкоджаньні, ад якіх пацярпелы памёр на месцы злачынства», — распавяла прадстаўнік пракуратуры.
Яна таксама ўдакладніла, што ў кастрычніку крымінальная справа была накіраваная ў абласны суд. Мужчына абвінавачваецца ў забойстве, учыненым з асаблівай жорсткасьцю.
«Дзейным крымінальным заканадаўствам за наўмыснае забойства, учыненае з асаблівай жорсткасьцю, прадугледжанае пакараньне ў выглядзе пазбаўленьня волі на тэрмін ад 8 да 25 гадоў. Таксама можа быць прызначана пакараньне ў выглядзе пажыцьцёвага зьняволеньня або сьмяротнага пакараньня», — адзначыла Пархімовіч.
