Лінкі ўнівэрсальнага доступу

Даведацца праўду пра зьбіты «Боінг»


Рэшткі самалёта Malaysia Airlines

Рэшткі самалёта Malaysia Airlines

У Нідэрляндах расьце недавер да ўраду ў сувязі з расьсьледаваньнем катастрофы малайзійскага пасажырскага самалёта пад Данецкам, ахвярамі якой сталі 196 грамадзянаў гэтай краіны.

Новай падставай для заяваў аб тым, што ўлады Нідэрляндаў хаваюць ад грамадзтва важную інфармацыю пра абставіны трагедыі, стала публікацыя ў нямецкім часопісе Der Spiegel матэрыялу аб спадарожнікавых здымках, якія нібыта даказваюць, што самалёт быў зьбіты сэпаратыстамі з ракетнай устаноўкі «Бук», выкрадзенай з украінскай вайсковай базы.

Адзін са сваякоў загінулых, страціўшы надзею даведацца нешта з афіцыйных крыніцаў, адправіўся на месца катастрофы сам — і цудам застаўся ў жывых.

Сьпявак Робі Улерс страціў у катастрофе пад Данецкам любімую пляменьніцу Дэйзі. Дваццацігадовая Дэйзі ляцела на Балі разам са сваім жаніхом Брусам. Ад Бруса засталася адна ступня. Дэйзі доўгі час не маглі ідэнтыфікаваць, і Робі Улерс вырашыў больш не чакаць праўды ад дзяржавы. Купіўшы квіткі ў Кіеў, ён затым дабраўся да Данецку і дамовіўся з сэпаратыстамі, каб тыя за грошы адвезьлі яго на месца крушэньня. Карэспандэнт тэлекампаніі NOS здымаў Улерса на фоне чорна-белага апакаліптычнага краявіду ў поўнай цішыні. Толькі зрэдку Улерс прамаўляе некалькі словаў. У доўгіх паўзах вые вецер і зрэдку чуюцца залпы снарадаў удалечыні. У адным з кадраў Улерс залазіць у катлаван — велізарную варонку ад снарада, які разарваўся сярод абломкаў Боінга:

«Гэтыя... хто гэта зрабіў... (доўгая паўза, пад сьвіст ветру). Я спрабую ўявіць сабе, што б я зь імі зрабіў. Але ў мяне нават словаў для гэтага не хапае. Няма пакараньня, якое было б занадта жорсткім для такіх, як яны. (Чуваць, як разрываюцца снарады). Вось гэты быў зусім блізка, чулі? Затрымлівацца тут ня варта. Больш за ўсё мне хацелася б тут паставіць намёт, распаліць вогнішча і спакойна пачаць шукаць. Але не, мне ня справіцца, абломкаў тут безьліч. Тэрыторыя занадта вялікая».

Гэтыя кадры паказалі ў эфіры ў нядзелю, 19 кастрычніка. У панядзелак Улерс сам ледзь не загінуў, калі па суседзтву зь яго гатэлем разарвалася бомба. Ва ўсіх будынках па пэрымэтры вылецелі вокны, у тым ліку ў аўтобусе з журналістамі — паведаміў Улерс ў сваім твітэры. Жонка ў камэнтарах да гэтага твіту моліць Улерса вярнуцца, каб не рабіць зь яе чарговую «сваячку загінулага». У сераду ў Твітэры Улерса зьявіўся запіс аб тым, што цела яго пляменьніцы Дэйзі нарэшце было ідэнтыфікаванае.

Поўны матэрыял чытайце на сайце расейскай службы Радыё Свабода.

XS
SM
MD
LG