Прэзыдэнт Кіргізстану Алмазбек Атамбаеў 10 кастрычніка возьме ўдзел у саміце кіраўнікоў дзяржаў СНД у Менску.
Пра гэта паведаміла прэс-служба кіргіскага кіраўніка.
У рамках візыту заплянаваны шэраг двухбаковых сустрэч з кіраўнікамі дэлегацыяў іншых краін.
Атамбаеў упершыню наведвае Беларусь, дзе атрымаў прытулак зрынуты прэзыдэнт Кіргізстану Курманбек Бакіеў. Кіргіскі бок неаднаразова патрабаваў выдаць Курманбека Бакіева, а таксама яго малодшага брата Жаныша Бакіева, якія асуджаныя да пажыцьцёвага зьняволеньня за цяжкія злачынствы. Аднак афіцыйны Менск адмовіўся выдаць Бакіевых кіргіскім уладам.
У сустрэчы міністраў замежных спраў краін СНД у Менску ўзяў удзел міністар замежных спраў Кіргізстану Эрлан Абдылдаеў.
Ці былі ў міністра сустрэчы зь беларускім бокам адносна пытаньня аб выдачы Бакіева і ці плянуецца абмеркаваць гэтую праблему падчас візыту кіргіскага прэзыдэнта? Прэсавы сакратар Міністэрства замежных спраў Беларусі Дзьмітры Мірончык сказаў карэспандэнту Свабоды:
«Міністар замежных спраў Кіргізстану знаходзіцца ў Беларусі менавіта для ўдзелу ў мерапрыемствах у рамках СНД. У адрозьненьне, напрыклад, ад візыту міністра замежных спраў Азэрбайджану, які быў тут з афіцыйным візытам. То бок асобнай праграмы ці асобных сустрэч не прадугледжваецца. Што тычыцца кіраўніка кіргіскай дзяржавы, гэта асобнае пытаньне, якое ня ў нашай кампэтэнцыі».