Як высьветлілася, абодва мужчыны прыйшлі па журналісцкіх пасьведчаньнях (выдадзеных студэнцкім часопісам Babylon). Абодва пад адзеньнем мелі намаляваныя ўкраінскія сьцяжкі, а таксама лёзунгі «Ня будзьце з Пуціным» і «Прэм’ер, адвагу!»
Сучаснае чэскае кіраўніцтва, у тым ліку прэм’ер Багуслаў Собатка, даволі стрымана ўспрынялі санкцыі Захаду супраць Расеі. У прыватнасьці, эканаміст паводле адукацыі Собатка ня раз у сваіх выказваньнях даваў зразумець, што санкцыі супраць Расеі нявыгадныя для чэскай прамысловасьці і экспарту.
«Спадар Собатка, вы — прэм’ер Чэскай рэспублікі. Ня будзьце прыхільнікам інтарэсаў фірмаў, якія гандлююць з пуцінскай Расеяй, — напісалі мужчыны ва ўлётцы, якую пасьпелі перадаць іншым журналістам. — Украіна патрабуе дапамогі. Вы яе сваімі выказваньнямі кідаеце за борт, падобна як гэта рабілі заходнія палітыкі, якія здрадзілі нашай краіне у Мюнхене у 1938-м годзе».
Дэманстранты спакойна ўспрынялі выдаленьне з залі, якое было карэктным. Міністар абароны Марцін Страпніцкі, які прысутнічаў на прэс-канфэрэнцыі, адзначыў, што самым важным для яго было тое, што нечаканых дэманстрантаў ніхто не пасылаў у накаўт і не надзяваў ім наручнікі.
Як удакладняюць чэскія мэдыі, сталі вядомыя імёны затрыманых. Гэта галяндзец Атакар ван Гемунд, які жыве ў Чэхіі 25 гадоў, і чэх Марэк Гілшэр, навуковы супрацоўнік. Пасьля высьвятленьня асоб яны былі адпушчаныя паліцыяй. Выпадак будзе разглядацца як адміністрацыйнае правапарушэньне.