«Дзяржаўная мяжа Ўкраіны праходзіла, праходзіць і будзе праходзіць там, дзе яна зафіксаваная міжнароднымі дамовамі, дзе яна прызнаная ўсясьветнай супольнасьцю. І ніякіх таргоў, ніякіх дамоўленасьцяў аб нібыта перадачы або перамяшчэньні ўкраінскай мяжы быць ня можа», — заявіў прэзыдэнт Украіны Пятро Парашэнка ў Кіеве падчас праверкі гатоўнасьці памежных падразьдзяленьняў да выкананьня мерапрыемстваў у рамках рэалізацыі мірнага пляну.
Паводле Парашэнкі, усе іншыя трактоўкі адносна лініі ўкраінскай мяжы — палітычныя спэкуляцыі, якія б’юць ня толькі па палітычных апанэнтах, а па ўсёй краіне.
«І наша з вамі сьвятое заданьне — гэтую мяжу абараніць», — сказаў Парашэнка, зьвяртаючыся да памежнікаў.
Ён адзначыў, што пазыцыя ўлады ў памежнай палітыцы дакладная і нязьменная:
«Мяжа павінна быць празрыстай для ўсіх, хто прыйдзе ва Ўкраіну зь мірам, і надзейна абароненай ад тых, хто мае дрэнныя намеры і прыйшоў да нас з вайной».
Прэзыдэнт растлумачыў, што Ўкраіна выкарыстоўвае час спыненьня агню для таго, каб «добра абараняць дзяржаву».
Рэжым спыненьня агню фармальна дзейнічае ва Ўкраіне з 5 верасьня. Украінскія сілавікі і прарасейскія баевікі тым часам вінавацяць адны адных у парушэньні перамір’я.
