Генэральны сакратар НАТО Енс Столтэнбэрг лічыць, што парушэньні спыненьня агню на ўсходзе Ўкраіны выклікаюць сур’ёзны непакой.
Пра гэта ён заявіў у панядзелак падчас свайго візыту ў Польшчу.
Гэта яго першы візыт у якасьці генэральнага сакратара НАТО за мяжу.
Паводле яго слоў, НАТО занепакоеная сытуацыяй ва Ўкраіне. "Мы віталі спыненьне агню і разглядалі гэта як прадстаўленую магчымасьць«,— падкрэсьліў ён.
«У той жа час мы бачым, што адбываюцца парушэньні рэжыму спыненьня агню. А гэта выклікае ў нас вялікую занепакоенасьць. Я падтрымліваю ўрад Украіны ў тым, што ён вельмі шмат робіць для захаваньня рэжыму спыненьня агню і ўносіць ўклад у палітычнае рашэньне канфлікту», — заявіў Столтэнбэрг.
Генэральны сакратар сказаў, што ягоны візыт у Польшчу — прызнаньне важнай ролі, якую гэтая краіна гуляе ў НАТО і прыкмета салідарнасьці ў гэтыя неспакойныя часы. НАТО абараняе кожнага саюзьніка, сказаў генэральны сакратар.
Столтэнбэрг таксама адзначыў, што плян НАТО па ўзмацненьні вайсковай прысутнасьці ва Ўсходняй Эўропе не парушае дамоўленасьцей з Расеяй, дасягнутых пасьля заканчэньня «халоднай вайны» аб узроўні ваенных сіл у рэгіёне.
Выступаючы на ваенна-паветранай базе Ласкі ў Цэнтральнай Польшчы, Столтэнбэрг выказаў падтрымку стварэньню сіл хуткага рэагаваньня для падтрымкі дзяржаў-сябраў НАТО ва Ўсходняй Эўропе, занепакоеных умяшальніцтвам Расеі ва Ўкраіне.
Паведамляючы пра візыт Сталтэнбэрга ў Польшчу, Reuters нагадвае, што ў маладосьці ён быў антываенныя актывістам, а таксама вядомы сваімі навыкамі ў наладжваньні кампрамісаў і веданьнем Расеі.
