Лінкі ўнівэрсальнага доступу

1 кастрычніка ў Магілёўскай ратушы абвясьцілі імя гарніста, які, паводле задумы, «будзе абуджаць» магілёўцаў.

Мэханічнага трубача назвалі Магіславам. Тры разы на дзень пад гукі фанфары ён мае «выходзіць» з будынка ратушы.

Кіраўнік музэю гісторыі Магілёва Аляксей Бацюкоў заявіў Свабодзе, што ў мэханічнага трубача — пасада ганаровага фанфарыста:

«Гэта сымбалічны ганаровы вобраз, які фанфарай абуджае горад — дае сыгнал на пачатку пэўнай гадзіны, альбо падзеі. Гэта такая распаўсюджаная ў сярэднявеччы традыцыя. Абуджаць ён будзе гараджан першы раз апоўдні, другі раз а восьмай вечара, бо васьмёрка — гэта сымбаль вечнасьці. У трэці раз ён будзе „выходзіць з ратушы“ у момант заходу сонца».

Вырабілі ганаровага магілёўскага фанфарыста скульптар Андрэй Вераб’ёў і гадзіньнікавы майстар Генадзь Галоўчык.

Андрэй Вераб’ёў зазначае, што мэханічны гарніст — гэта яшчэ адзін магілёўскі сымбаль, які, на ягоную думку, будзе рабіць горад візуальна пазнавальным і адметным.

«У Магілёва, — кажа скульптар, — зьявілася яшчэ адна цікавостка, якую можна паказваць гасьцям гораду. Трубача ўсталявалі на знакавым для гораду будынку — ратушы. І ён цяпер частка яе. У кожнага эўрапейскага гораду ёсьць свая адметнасьць — у Магілёва свая».

На імпрэзу, прымеркаваную да «імянінаў» трубача прыйшло нямала гасьцей. Магіслава ўсталявалі на бальконе ратушы 28 чэрвеня. Тады ж яго паказалі магілёўцаў. Сёньня ён паказаўся другі раз.

Паказаць камэнтары

XS
SM
MD
LG