Праваабарончая прэмія, якую дае Парлямэнцкая Асамблея Рады Эўропы у партнэрстве зь Бібліятэкай Вацлава Гаўла і Фондам Хартыя 77, прысуджаецца грамадзкаму актывісту або недзяржаўнай арганізацыі за заслугі ў праваабарончым руху.
Летась прэмію імя былога прэзыдэнта Чэхіі Вацлава Гаўла атрымаў беларускі праваабаронца Алесь Бяляцкі, які на той час знаходзіўся ў вязьніцы.
Сёлетнімі намінантамі на прэмію Вацлава Гаўла зьяўляюцца ізраільскі праваабарончы цэнтар «Бэцэлем», мальтыйская езуіцкая служба дапамогі ўцекачам і азэрбайджанскі праваабаронца Анар Мамадлі.
Трох намінантаў са сьпісу 56 кандыдатаў выбрала група шасьці экспэртаў пад старшынёўствам кіраўніцы ПАРЭ Ан Брасэр. І якраз Ан Брасэр абвесьціць імя ляўрэата прэміі Вацлава Гаўла на сёньняшнім адкрыцьці восеньскай сэсіі ПАРЭ ў Страсбуры.
Ляўрэат атрымае дыплём і матэрыяльную ўзнагароду — 60 тысяч эўра. Сродкі прадстаўляе ўрад Чэхіі.
