У Японіі падчас пошукаў зьніклых пасьля пачатку вывяржэньня вулькана Онтакэ знойдзеныя каля 30 чалавек з прыкметамі спыненьня сэрца.
Пра гэта паведамляюць мясцовыя чыноўнікі і паліцыянты. Як адзначаюць агенцтвы, пра сур’ёзныя праблемы з сэрцам і лёгкімі ў Японіі паведамляюць, як правіла, перад тым, як лекары афіцыйна пацьвердзяць наступ сьмерці.
Раней паведамлялася пра пошукі больш за 30 зьніклых у прэфэктуры Нагана.
Вывяржэньне, якое называюць нечаканым, пачалося ў суботу. Попел і клубы дыму выкідваліся на вышыню ў некалькі кілямэтраў. Дзясяткі людзей былі тэрмінова эвакуяваныя, многія зь іх — альпіністы, калі іх здарэньне застала зьнянацку. Пацярпелі дзясяткі людзей.
Вулькан ў прэфэктуры Нагана разьмешчаны прыкладна за 200 кілямэтраў на захад ад Токіа. Онтакэ — другі па велічыні вулькан ў Японіі. Яго вышыня складае 3067 мэтраў. Да гэтага вывяржэньне адбывалася ў 2007 годзе.
