Лінкі ўнівэрсальнага доступу

Даеш вуліцу Леніна-Касьцюшкі! Апытаньне ў Берасьці


Як вы ставіцеся да таго, што цэнтральныя вуліцы і плошчы амаль усіх беларускіх гарадоў названы імёнамі расейскіх бальшавікоў? Ці варта гэтыя назвы мяняць? Чаму?

Малады хлопец: Ну я думаю, што ў Беларусі хапае годных людзей, каб у іх гонар былі названыя нашы родныя беларускія вуліцы. Мне падаецца, што варта... Якуб Колас, Янка Купала — гэта такія больш вядомыя людзі...

Маладая спадарыня: Гэтыя назвы трэба мяняць. Вунь, у суседняй Польшчы ўжо даўно перайменавалі вуліцы. Савецкіх там ужо няма. У кожным горадзе ёсьць героі, у гонар якіх можна назваць вуліцы. Ну, проста гэта будзе не пры гэтай уладзе, а калі гэта будзе — невядома...

Пэнсіянэр: Бліжэйшы час гэта ня будзе, пакуль гэты рэжым ёсьць, а на будучыню, канешне, трэба... З прыходам да ўлады другіх людзей, гэта, я думаю, будзе такое першапачатковае рашэньне. З камуністамі... як і ва ўсім сьвеце трэба правесьці люстрацыю, расьсьледаваньне, што яны зрабілі з гэтай Беларусьсю... У многіх дзяржавах ужо забароненая гэтая партыя, я думаю, прыйдзе час і ў нас такое будзе.

Спадарыня сярэдняга веку: Няхай застаюцца вуліцы тыя, якія былі раней. А новыя... У нас жа будуецца шмат новых мікрараёнаў. Няхай яны называюцца новымі імёнамі. А калі там і хочуць яны зьнесьці ці перайменаваць, то няхай як у нас прозьвішчы робяць — праз працяжнік... Вуліца з працяжнікам Леніна-Касьцюшкі...

Маладая спадарыня: Ну я думаю, што ня варта. Ад таго, што мы вуліцу пераймянуем, там асфальт лепшы ня зробіцца. Лічу, што на гэта ня варта траціць дзяржаўныя грошы, іх і так у дзяржаве мала. Я думаю, што гэта ўсё бессэнсоўна, хапае і іншых жыцьцёвых клопатаў, і шмат праблемаў у краіне і так...

Спадар сярэдняга веку: Трэба неяк пераймяноўваць, вядома. У нас таксама хапае ў Беларусі сваіх патрыётаў, сваіх суайчыньнікаў... Леніна... Ну, Леніна, гэта, канешне... усерасейскі, былы СССР... Але, таксама, можна паступова, акуратна так, бязь нейкіх аказій зьнесьці, ці нешта новае прыдумаць.

Паказаць камэнтары

XS
SM
MD
LG