Лінкі ўнівэрсальнага доступу

«Мільярд даляраў — гэта толькі прыгожая лічба» — экспэрт пра беларуска-малдаўскі гандаль


Беларусі і Малдове трэба арыентавацца на таваразварот у адзін мільярд даляраў. Пра гэта заявіў у Кішынёве Аляксандар Лукашэнка пасьля сустрэчы са сваім малдаўскім калегам Мікалаем Цімафці.

Калі зыходзіць з вынікаў 2013 году, то гэта азначае павелічэньне ўзаемнага гандлю ўтрая, бо летась Беларусь і Малдова нагандлявалі на 360 мільёнаў даляраў.

На думку Лукашэнкі, шлях да значнага росту таваразвароту ляжыць праз вытворчую каапэрацыю і выхад з супольнай прадукцыяй на рынкі Эўразьвязу і трэціх краін.

«Гэта толькі добрыя пажаданьні і ня болей за тое, толькі прыгожая лічба», — выказвае сваё меркаваньне ў размове са Свабодай эканаміст Сяргей Чалы:

Сяргей Чалы

Сяргей Чалы

«Калі мы самі ня можам выйсьці на заходнія рынкі, то чаму мы думаем, што гэта атрымаецца праз Малдову? Мабыць, ёсьць спадзяваньні, што пасьля падпісаньня Малдовай дакумэнтаў аб асацыяцыі з Эўразьвязам адразу загарыцца зялёнае сьвятло на заходніх рынках. Там пакуль толькі зьменшаныя экспартныя пошліны для выхаду на эўрапейскі рынак. Але ж нашы праблемы палягаюць ня ў коштах, напрыклад, тых жа трактароў. Праблема — іх якасьць. І ў мяне вялікі сумнеў, што калі нават адкрыць у Малдове супольную беларуска-малдоўскую вытворчасьць, трактары стануць тэхналягічна лепшымі. А бяз гэтага каму яны патрэбныя ў Эўразьвязе?»

Згодна з афіцыйнымі дадзенымі, у Беларусь з Малдовы імпартуюцца найперш вінаматэрыялы і вінаграднае віно, моцныя сьпіртовыя напоі, сьвежая садавіна.

«Уласна кажучы, там больш амаль нічога і няма, — канстатуе Сяргей Чалы. — Прамысловасьць канцэнтруецца ў Прыднястроўі. Ёсьць пара электрастанцыяў, дый тыя, калі я не памыляюся, належаць украінскім алігархам. Так што там складана нават нешта прамысловае знайсьці».

Асноўныя артыкулы беларускага экспарту ў Малдову — нафтапрадукты, тытунёвыя вырабы, трактары, аўтамабілі, керамічная плітка.

XS
SM
MD
LG