Лінкі ўнівэрсальнага доступу

Кангрэсмэн Марсі Каптур: «Захад мае вялікія маральныя абавязкі перад Украінай»


Пятро Парашэнка падчас выступу на паседжаньні Кангрэсу ЗША

Пятро Парашэнка падчас выступу на паседжаньні Кангрэсу ЗША

Амэрыканскія кангрэсмэны станоўча адрэагавалі на выступ прэзыдэнта Ўкраіны Пятра Парашэнкі перад абедзьвюма палатамі Кангрэсу ЗША 18 верасьня.

Марсі Каптур, кангрэсмэн з Агаё, падтрымала просьбу Пятра Парашэнка прызнаць Украіну саюзьнікам ЗША па-за межамі НАТО:

«Я заклікала нашых генэралаў, вайскоўцаў і НАТО разгледзець магчымасьць фармаваньня сыстэмы абароны у той частцы Эўропы, якая гадамі пакутавала. Цяпер прэзыдэнт Парашэнка просіць прызнаньня Ўкраіны стратэгічным саюзьнікам ЗША па-за НАТО... Гэты статус даў бы магчымасьць Украіне падтрымаць бясьпеку. Незалежна ад таго, адкуль бы прыйшла дапамога, — з Польшчы, Балкан ці краінаў Балтыі. Але мусіць быць збудаваная добрая структура для бясьпекі Ўкраіны. Я маю адчуваньне, што Ўкраіну пакінулі на разарваньне вятрам і таму цяпер Захад мае вялікія маральныя абавязкі перад Украінай».

Кангрэсмэн Майк Квіглі ў інтэрвію «Голасу Амэрыкі» назваў выступ Пятра Парашэнкі «беспрэцэдэнтным»:

«Выступ Пятра Парашэнкі прыйшоўся на крытычны, паваротны момант у гісторыі Ўкраіны. Я веру, што прэзыдэнт Пуцін прагне аднавіць СССР і без Украіны ён гэтага ня зробіць. Таму ЗША павінны зрабіць усё магчымае, каб абараніць суверэнітэт Украіны... Пуцін цалкам непрадказальны, але я думаю, што ЗША будуць рэагаваць на дзеяньні Расеі. Я і мае калегі будзем працаваць, каб Украіна атрымлівала падтрымку. Мы разумеем, што адбываецца».

Кангрэсмэн Джым Герлак з Пэнсыльваніі ў інтэрвію «Голасу Амэрыкі» заявіў, што выступ прэзыдэнта Парашэнкі ў Кангрэсе выведзе стасункі паміж Украінай і ЗША на новы ўзровень. Герлак лічыць, што ЗША і надалей будуць надаваць Украіне падтрымку:

«ЗША ўжо надаюць Украіне бронекамізэлькі, прылады начнога бачаньня і іншае. Нямала людзей у Кангрэсе лічаць, што мы мусім пашырыць кшталт і характар абсталяваньня, якое ЗША надаюць Украіне, і ўключыць у яго абарончую зброю. Але прэзыдэнту давядзецца зважаць на тое, што робіць і чаго ня робіць Пуцін і той факт, што расейскія сілы дагэтуль знаходзяцца на ўсходзе Ўкраіны і ў Крыме і не зьбіраюцца іх пакідаць. Думаю, што гэта мае стаць сыгналам для нашага прэзыдэнта, што настаў час узмацніць падтрымку Ўкраіны і дапамогу ў вайсковым сэнсе. Таму ў Палаце прадстаўнікоў аднагалосна ўхвалілі рэзалюцыю, якая заахвочвае прэзыдэнта да такіх дзеяньняў».

Прэзыдэнт Украіны Пятро Парашэнка 18 верасьня ўпершыню прыбыў з афіцыйным візытам у ЗША. Зранку ён выступіў у Кангрэсе, дзе заклікаў надаць Украіне статус стратэгічнага саюзьніка ЗША па-за НАТО, дапамагчы ўкраінскаму войску ўзбраеньнем і стварыць адмысловы фонд падтрымкі інвэстыцый з Украінай. Пасьля гэтага Пятро Парашэнка сустрэўся з прэзыдэнтам ЗША Баракам Абамай.

XS
SM
MD
LG