«Нам удалося вызваліць 1200 закладнікаў», — цытуе Парашэнку «Ўкраінская праўда».
Таксама ён паведаміў, што з акружэньня 7 верасьня былі выведзены 33 украінскія вайскоўцы, якія не здаліся ў палон.
Падчас рабочай паездкі ў Данецкую вобласьць Парашэнка наведаў Марыюпальскі мэталюргічны камбінат, паведамляе прэзыдэнцкая прэс-служба.
«Мы будзем рабіць усё, каб быў мір, але будзем рыхтавацца да абароны сваёй краіны», — заявіў прэзыдэнт Украіны.
«Марыюпаль ёсьць і будзе ўкраінскім», — заявіў Парашэнка і дадаў, што ўся Ўкраіна гатовая дапамагаць абараняць горад.
Парашэнка загадаў узмацніць абарону Марыюпалю з паветра, а таксама на зямлі — танкамі ды ракетнымі ўстаноўкамі.
Ён заявіў, што Ўкраіна нікому не аддасьць сваю зямлю.
Прэзыдэнт Украіны паведаміў, што блёкпасты ўкраінскіх сілавікоў былі абстраляныя пасьля зьяўленьня анонсу яго прыбыцьця ў Марыюпаль а 13:30 панядзелка.
«Думалі напалохаць. Ніхто не баіцца», — гаворыцца ў Twitter’ы кіраўніка дзяржавы.
Да абвяшчэньня перамір’я 5 верасьня каля гораду ішлі жорсткія баі паміж украінскімі сілавікамі і прыхільнікамі самаабвешчанай Данецкай народнай рэспублікі.