Лінкі ўнівэрсальнага доступу

logo-print

«Лукашэнка — марыянэтка. Абдымаецца з Парашэнкам, а потым з Пуціным»


Якія ўрокі павінна зрабіць беларуская ўлада на падставе падзеяў ва Ўкраіне? Адказваюць жыхары Берасьця.

Чым, на вашу думку, падзеі на паўднёвым усходзе Ўкраіны небясьпечныя для Беларусі? Якія ўрокі павінна зрабіць беларуская ўлада на іх падставе? На такое пытаньне карэспандэнта Свабоды адказвалі сёньня жыхары Берасьця.

Пэнсіянэрка: Небясьпекі, мне падаецца, у нас не павінна быць. У нас такога ня будзе, як ва Ўкраіне. А якія павінны вынесьці ўрокі?.. У нас няма розьніцы — рускі, беларус... Ня дзеляць у нас, так як ва Ўкраіне. Ва Ўкраіне ж нельга гаварыць на рускай мове, толькі на ўкраінскай. А ў нас гавары на якой хочаш — хоць сабе на нямецкай, францускай... на кітайскай... На ўсякай гавары, у нас жа не забараняюць. А там ёсьць у іх розьніца. А ў нас розьніцы няма. У нас усе жывуць мірна і дружна.

Пэнсіянэр: На Беларусі адаб’ецца, канешне. Ужо адбілася — многія нашыя людзі ваююць і на тым, і на другім баку. Канешне, будзе Беларусь уцягнутая ў гэтую вайну, будуць гінуць нашыя дзеці... А Лукашэнка... Лукашэнка, ён... Што там гаварыць пра яго... Ён танцуе пад дуду Крамля. І ў яго там ніхто ня будзе пытаць. Што яны там вырашаць у Крамлі, тое ён і будзе рабіць. Ён абдымаецца з Парашэнкам, а потым з Пуціным. Гэта марыянэтка, так што я пра яго нават і гаварыць нічога не хачу.

Спадарыня сярэдняга веку: Ну, я нават і ня ведаю, чым яна можа быць небясьпечная. Ну, па-першае, прыяжджаюць прэзыдэнты у Беларусь, у Менск, яны тут вырашаюць праблемы ўкраінскія, каб вайна спынілася. То можа нашае кіраўніцтва таксама задумалася над тым, каб нашу Беларусь не ўцягнуць у тую сытуацыю, якая ва Ўкраіне. Улады, канешне, павінныя засьцерагацца такіх падзеяў, каб у нас вайны ня было.

Маладая дзяўчына: Канешне, вайна ва Ўкраіне адаб’ецца і на Беларусі. Сёньня ў інтэрнэце чытала, што Лукашэнка ўмацоўвае мяжу з Расеяй. Ну, гэта ж значыць, што ён баіцца, што яны могуць сунуцца і сюды... Таму, я думаю, што беларускія ўлады перажываюць і будуць прымаць нейкія меры на гэтым узроўні.

Спадар сярэдняга веку: Я проста ня ведаю, зараз, здаецца, перамовы, спыненьне агню братазабойчага. Але мне здаецца, што паўднёвы ўсход не прабачыць Парашэнку, Каламойскаму і ўсім астатнім... А Беларусі... У Беларусі, канешне, страшна, калі такая справа будзе, але я думаю, што да гэтага ня дойдзе. Беларусь усё-такі больш-менш спакойная краіна. Яны разумеюць, ужо бачаць урок з Украінай. Што з гэтага можа быць... І мне падаецца, што беларусы на такое ня пойдуць.

Паказаць камэнтары

XS
SM
MD
LG