«Мы будзем дапамагаць Украіне, прыкладна 15 млн. эўра дамо праз НАТО», — сказаў генэральны сакратар.
Паводле яго, альянс падрыхтаваў пакет мер, якія прадугледжваюць дапамогу Кіеву па розных напрамках.
«Мы зьвярнулі ўвагу на кібэрбясьпеку, пытаньні лягістыкі, спэцыяльныя камунікацыйныя і камандныя праграмы. Таксама мы будзем дапамагаць параненым салдатам», — дадаў Фог Расмусэн.
Ён таксама адзначыў, што НАТО дапаможа Ўкраіне ў рэфармаваньні абарончай сфэры.
Прэзыдэнт Украіны Пятро Парашэнка, у сваю чаргу, паведаміў, што на перамовах у Ньюпорце была дасягнутая дамоўленасьць аб пастаўках ва Ўкраіну высокадакладнай зброі.
«Дасягнута дамоўленасьць на двухбаковым узроўні (з краінамі-чальцамі НАТО) адносна ваенна-тэхнічнага супрацоўніцтва, у тым ліку аб пастаўках нелетальнага і лятальнага ўзбраеньня, уключаючы высокадакладную зброю», — заявіў кіраўнік дзяржавы.
Парашэнка падкрэсьліў, што гэтая дамоўленасьць дасягнутая не з альянсам у цэлым, а з канкрэтнымі краінамі-удзельніцамі альянсу.
Пётар Парашэнка не ўдакладніў, зь якімі менавіта краінамі ён дамовіўся аб ваеннай дапамозе. Вядома, што ў чацьвер ён праводзіў сустрэчы зь лідэрамі ЗША, Нямеччыны, Францыі, Італіі, Вялікабрытаніі і Канады.
