Кіраўнік Міністэрства замежных спраў Расеі Сяргей Лаўроў мяркуе, што, акрамя сустрэчы кіраўнікоў краін Мытнага саюзу з прэзыдэнтам Украіны адбудзецца двухбаковая сустрэча прэзыдэнтаў Расеі і Ўкраіны Ўладзімера Пуціна і Пятра Парашэнкі.
Пра гэта ён сказаў на прэсавай канфэрэнцыі ў Маскве ў панядзелак, паведамляе Інтэрфакс.
«Так, заплянаваны цэлы шэраг двухбаковых сустрэч. Канкрэтна пра тое, хто і дзе будзе сустракацца, будзе абвешчана дадаткова», — адзначыў Лаўроў.
Такім чынам ён адказаў на пытаньне журналістаў, ці заплянаваная сустрэча Пуціна і Парашэнкі ў Менску ў двухбаковым фармаце.
26 жніўня ў Менску адбудзецца сустрэча кіраўнікоў дзяржаў Мытнага саюзу, прэзыдэнта Ўкраіны і прадстаўнікоў Эўрапейскага Зьвязу.