Упершыню пасьля падзеньня рэжыму Садама Хусэйна афіцыйная беларуская дэлегацыя пабывала ў Іраку.
Беларуская дэлегацыя на чале з міністрам замежных спраў Уладзімерам Макеем 23–24 жніўня наведала з афіцыйным візытам Ірак.
Гэта першы з 2003 года візыт дэлегацыі Беларусі такога ўзроўню ў Ірак, паведамляе прэс-служба беларускага МЗС.
У склад дэлегацыі ўвайшлі прадстаўнікі кіраўніцтва Міністэрства прамысловасьці, канцэрна «Белнафтахім» і супрацоўнікі МЗС.
24 жніўня Макея прыняў прэзыдэнт Ірака Мухамэд Фуад Масум.
«Прэзыдэнт Ірака ацаніў візыт кіраўніка беларускага зьнешнепалітычнага ведамства як сыгнал падтрымкі ірацкага кіраўніцтва ў барацьбе з экстрэмістамі», — адзначаецца ў паведамленьні МЗС Беларусі.
Уладзімер Макей асудзіў дзеяньні тэрарыстычных груп, якія прывялі да маштабных ахвяраў сярод ірацкага насельніцтва, і пацьвердзіў «настроенасьць Беларусі на пашырэньне партнэрства з Іракам па ўсіх напрамках».
Адбыліся таксама сустрэчы кіраўніка МЗС Беларусі з прэм’ер-міністрам Ірака Нуры Камалем аль-Малікі і кандыдатам на пасаду прэм’ера Хайдарам аль-Абадзі.
На іх «падрабязна абмеркаваныя магчымыя шляхі нарошчваньня гандлёва-эканамічнага супрацоўніцтва паміж дзьвюма краінамі».
