Лінкі ўнівэрсальнага доступу

Менская сустрэча, калі яна і адбудзецца, не наблізіць канец вайны — экспэрт


Уладзімер Пуцін і Пятро Парашэнка

Уладзімер Пуцін і Пятро Парашэнка

У Менску 26 жніўня мае адбыцца сустрэча на высокім роўні ў фармаце Ўкраіна — Эўрапейскі Зьвяз — Мытны саюз. Аднак паводзіны расейскага прэзыдэнта Ўладзімера Пуціна ў апошнія дні даюць падставу некаторым палітыкам і палітолягам паставіць пад сумнеў магчымасьць такой сустрэчы.

У беларускай сталіцы афіцыйныя чыноўнікі не камэнтуюць сытуацыю. Але дагэтуль невядома нават, дзе пройдзе сустрэча — ва ўрадавай рэзыдэнцыі «Заслаўль», як гэта было раней на падобных мерапрыемствах, альбо дзесьці ў іншым месцы.

Доктар паліталягічных навук Павал Вусаў таксама ня ўпэўнены, што менская сустрэча адбудзецца ў аб’яўлены раней час. "Але калі яна і пройдзе 26 жніўня, то чакаць, што гэта сустрэча наблізіць канец вайны ва Ўкраіне, не выглядае праўдападобна«,— гаворыць экспэрт:

Павал Вусаў

Павал Вусаў

«Як мы бачым па апошніх падзеях, Расея інтэнсіўна ўмешваецца ў канфлікт. Яна не робіць ніякіх рэальных крокаў, каб завершыць гэты канфлікт.

Па-другое, магчыма, што менскай сустрэчы наагул ня будзе, калі сытуацыя яшчэ больш пагоршыцца.

І трэці момант — ніводная з папярэдніх сустрэч нават не стварыла ўмоваў дзеля таго, каб гэты канфлікт быў вырашаны. Мы бачым, што Расея спрабуе ўсялякімі спосабамі падоўжыць яго. І калі не перамагчы ў гэтай вайне, то хоць бы нанесьці максымальныя страты — людзкія і матэрыяльныя — Ўкраіне. І зрабіць так, каб Данбас застаўся на доўгі час вялікай ранай для Ўкраіны».

Сёньня стала вядома, што канцлер Нямеччыны Ангела Мэркель сустрэлася ў Кіеве з украінскім прэзыдэнтам Пятром Парашэнкам. Яна паабяцала гуманітарную дапамогу ў памеры 500 мільёнаў эўра на аднаўленьне Данбасу.

Канечне, гэта добрая справа, — кажа Павал Вусаў. — Аднак спыніць расейскую агрэсію такім чынам немагчыма. Тут патрэбныя толькі жорсткія крокі:

«Гэта — матэрыяльная, тэхнічная і нават вайсковая дапамога Ўкраіне. Гэта пакажа, што ёсьць агульная падтрымка Ўкраіне ў яе барацьбе з расейскім сэпаратыстамі.

Другое — гэта пашырэньне санкцыяў супраць Крамля, працяг эканамічнага ціску на Расею.

І трэці момант — увядзеньне абмежаванага вайсковага кантынгенту (НАТО альбо ААН) на тэрыторыю Ўкраіны. І такім чынам пры дапамозе сілы прымусіць Расею скончыць гэтую вайну».

Ці зьбіраецца беларуская апазыцыя нейкім чынам рэагаваць на магчымае правядзеньне ў Менску сустрэчы па Ўкраіне? Старшыня Аб’яднанай грамадзянскай партыі Анатоль Лябедзька гаворыць Свабодзе, што партыя падрыхтавала праект спэцыяльнай заявы з гэтай нагоды. Сутнасьць дакумэнту такая:

Анатоль Лябедзька

Анатоль Лябедзька

«Салідарнасьць з Украінай, жаданьне бачыць там мір, гэта справа ня толькі Ўкраіны, а і пэрспэктывы далейшага разьвіцьця на постсавецкай прасторы».

Спадар Лябедзька сказаў, што раніцай 25 жніўня адбудзецца сустрэча лідэраў дэмакратычнай кааліцыі Беларусі. На ёй АГП прапануе ім далучыцца да заявы.

XS
SM
MD
LG