Пераможцам конкурсу Радыё Свабода на найлепшы дызайн для маек стаў аўтар выявы з «Пагоняй» на ровары. Дырэктар рэклямнага агенцтва, кіраўнік крэатыўнай дызайнэрскай групы, аўтар многіх папулярных праектаў Улад Савельеў — герой новага выпуску праграмы «Сталкеры Свабоды».
«Усё наша грамадзтва забылася на гісторыю. У вярхах кажуць, што гісторыя Беларусі пачалася ці то пасьля 17-га, ці то пасьля 45-га. Нібыта старонкі па гісторыі Беларусі былі проста вырваныя ў гэтых людзей.
А гісторыя — гэта вялікі пласт. Мы столькі жылі ў Вялікім Княстве Літоўскім, у нас столькі можна накапаць цікавых рэчаў — гэта й вайсковыя строі, і народныя арнамэнты, і шмат чаго яшчэ. Вось трэба рабіць такі сынтэз, мікст таго, што было ў тыя часы, далучаць да яго сучасныя трэнды — і будуць зьяўляцца цікавыя рэчы.
Цяпер я працую над новай цішоткай, у якой спалучу беларускі арнамэнт і знакамітыя кампутарныя гульні. Я думаю, што хутка зьявіцца на сьвет штосьці вельмі цікавае.
Сталкеры Свабоды
Сябры, якія вырабляюць гэтыя цішоткі, гэта дзьве цудоўныя дзяўчынкі, якія і намалявалі гэты дызайн. Ідэя мая, а дзяўчаткі дапамагаюць мне яе ажыцьцяўляць. Ім вялікі дзякуй, Марыне і Машы!
А ідэя ўзьнікла проста. Мы ўсе бачым, як набывае моцы гэты беларускі трэнд — велашпацыры па Менску. І калі гэтыя майкі зьявяцца ў продажы, удзельнікі гэтых шпацыраў вельмі ўзрадуюцца, думаю, таму што яны ўсе — людзі эўрапейска арыентаваныя, яны ведаюць, што гэта трэнды Эўропы, і катацца на ровары ў такой цішотцы будзе вельмі файна.
Я думаў, што я буду пераможцам, але калі глядзеў, як выбіралі гэтыя цішоткі, то разумеў, што на кожным кроку конкурсу мая магла зьнікнуць з кола фіналістаў.
Я жыву ў гэтай краіне, я дыхаю гэтым паветрам, я п’ю гэтую ваду, гэта — мая радзіма, і таму я не магу тут рабіць штосьці іншае. Я не магу вырабляць італьянскія боты ці швэдзкую мэблю. Гэта павінна быць усё ж цалкам накіравана на беларускую культуру, на беларускае грамадзтва, таму што гэта жыве дзесьці ўнутры, у сэрцы.
Трэба ствараць якасныя беларускія прадукты адразу, а наша справа — зрабіць іх больш знакамітымі. Ужо зьявіўся такі трэнд, што ўсё беларускае — гэта якаснае. І вось трэба, каб гэтае якаснае ня толькі на прадукт было зарыентавана, але яшчэ і на дызайн — дызайн упакоўкі, дызайн аздабленьня гэтага прадукту.
Вядома, беларусы больш прызвычаіліся плакаць, чым сьмяяцца, але кола гумару павінна шырыцца. Я думаю, што мы яшчэ не раскрылі новыя таленты моладзі. Гэтыя людзі, якія цяпер навучаюцца за мяжой, потым вернуцца. І ў іх усё наперадзе».