Беларускі КДБ распаўсюдзіў па СМІ і сацыяльных сетках папярэджаньне аб небясьпецы вярбоўкі грамадзян дзяржавы прадстаўнікамі «ўкраінскіх сэпаратыстаў».
«Апошнім часам пачасьціліся выпадкі спроб вярбоўкі неўстаноўленымі асобамі грамадзян Рэспублікі Беларусь для ўдзелу ў баявых дзеяньнях у складзе „народнага апалчэньня“ непрызнаных рэспублік паўднёвага ўсходу Ўкраіны. Дадзеныя асобы пры гэтым могуць апэляваць да вашых патрыятычных пачуцьцяў, а таксама абяцаць значнае грашовае ўзнагароджаньне», — гаворыцца ў папярэджаньні.
КДБ нагадвае, што баявыя дзеяньні на тэрыторыі суседняй сяброўскай дзяржавы не падтрымліваюцца прэзыдэнтам і ўрадам Рэспублікі Беларусь, а таксама папярэджвае грамадзян аб крымінальнай адказнасьці па артыкуле «найміцтва» — ад трох да сямі гадоў з канфіскацыяй маёмасьці, паводле беларускага заканадаўства.
Пра выпадкі такой вярбоўкі просяць паведамляць па тэлефоне даверу КДБ.
Крыніца ў Радзе бясьпекі Беларусі пацьвердзіла, што ў краіне сапраўды мелі месца спробы вярбоўкі для ўдзелу ў канфлікце ва Ўкраіне, паведамляе Газета.ру.