«Будзем ствараць базу ў Баранавічах, усё для гэтага ёсьць, адзінае, чаго чакаем — заключэньня міжурадавага пагадненьня. Пасьля гэтага прыступім да гэтых мерапрыемстваў у поўным аб’ёме» — сказаў ён.
У сакавіку генэрал Бондараў казаў, што да канца 2014 году на расейскай авіябазе ў Баранавічах будзе разгорнуты зьнішчальны авіяцыйны полк:"У Беларусі ў нас на сталай аснове зараз знаходзіцца зьвяно зьнішчальнікаў Су-27СМ3 у колькасьці чатырох машын. Паводле пляну гэтага году туды саджаем яшчэ эскадрыльлю, а да канца году на аэрадроме Баранавічы, дзе знаходзіцца наша авіябаза, будзе разгорнуты полк Су-27СМ3 ў складзе двух эскадрыльляў — усяго 24 машыны«.
Самалёты Су-27СМ3, хоць і зьяўляюцца зьнішчальнікамі, здольныя несьці бомбы, а таксама могуць утрая больш эфэктыўна, чым базавая мадэль Су-27, працаваць па наземных цэлях.
«Дадзеныя самалёты ў Беларусі — гэта хутчэй сыгнал нашым суседзям у Польшчы і краінах Балтыі. Для абароны, думаю, яны тут залішнія. Для гэтых мэтаў тут хапае нашай супрацьпаветранай абароны», — заявіў у інтэрвію Свабодзе ваенны экспэрт Аляксандар Алесін.
Аляксандр Алесін дадаў: «Год таму была інфармацыя, што гэты полк будзе разьмяшчацца ў Лідзе. Вядома, трэба было чакаць, што ўзважыўшы ўсе фактары, выбар будзе зроблены на карысьць Баранавічаў. У Лідзе першапачаткова базаваліся бамбардзіроўшчыкі, зараз там базуюцца штурмавікі і вучэбная эскадрыльля. А ў Баранавічах з савецкіх часоў базаваліся Су-27, Міг-29, там жа знаходзіцца авіярамонтны завод, які спэцыялізуецца на гэтых мадэлях. Апроч таго, у Баранавічах ёсьць уся неабходная інфраструктура: ангары, рамонтныя памяшканьні. Выглядае, што было вырашана зэканоміць на выдатках. Улічваючы хуткасьць Су-27 (каля 2500 км/г) і невялікую плошчу Беларусі, асаблівай розьніцы няма, дзе яны будуць знаходзіцца. Беларусь яны змогуць перасекчы за лічаныя хвіліны».