Лінкі ўнівэрсальнага доступу

Сёньня незалежныя журналісты і апазыцыйныя партыі гуляюць у футбол

  • БелаПАН

Фота Зьміцер Афанасенка

Фота Зьміцер Афанасенка

Традыцыйны футбольны турнір «Кубак Свабоды» памяці Генадзя Карпенкі праходзіць у Мінску.

У гэтым годзе ў турніры бяруць удзел 12 камандаў. Па выніках лёсаваньня яны былі разьмеркаваны на чатыры групы. У першай згуляюць каманды аргкамітэту па стварэньні партыі «Беларусі рух», Партыі БНФ і тэлеканалу «Белсат», у другой — Аб’яднанай грамадзянскай партыі, руху «За Свабоду» і арганізацыі «Маладая Беларусь», трэцяй — Беларускай асацыяцыі журналістаў, газэты «Наша ніва» і Беларускай сацыял-дэмакратычнай партыі (Грамада), чацьвёртай — Беларускага Хельсынскага камітэту, аргкамітэту партыі «Беларуская хрысьціянская дэмакратыя» і Беларускай партыі левых «Справядлівы сьвет».

Згодна з рэглямэнтам турніру, дзьве найлепшыя каманды выходзяць з групы, далей ідзе гульня на выбываньне.

У мінулым годзе турнір выйграла каманда БАЖ, стаўшы пяціразовым уладальнікам галоўнага трафэя. Тройчы турнір выйгравалі каманда АГП і зборная Партыі БНФ, двойчы — Беларускай партыі левых «Справядлівы сьвет» і «Беларускага руху», па адным разе — зборныя фонду імя Карпенкі і Кансэрватыўна-хрысьціянскай партыі — БНФ.

Турнір «Кубак Свабоды» праводзіцца з 1997 году. Да гэтага падобныя спаборніцтвы былі прымеркаваныя да прыняцьця Дэклярацыі аб сувэрэнітэце Рэспублікі Беларусь, і ў іх актыўна ўдзельнічаў сам Генадзь Карпенка. Пасьля сьмерці палітыка турнір назвалі яго імем.

Генадзь Карпенка памёр 6 красавіка 1999 г. ва ўзросьце 49 гадоў праз тыдзень пасьля таго, як перанёс інсульт. Раптоўная сьмерць апазыцыйнага палітыка выклікала шмат пытаньняў, якія да гэтага часу застаюцца без адказу.

XS
SM
MD
LG