Зюганаў і Сіманенка адказалі на пытаньні карэспандэнта Радыё Свабода пра месца, час і фармат правядзеньня перамоваў паміж прэзыдэнтамі.
Пётра Сіманенка, першы сакратар ЦК Кампартыі Ўкраіны:
«Які сэнс зьбірацца ўтрох без чацьвёртага? Трое гатовыя да гэтых сустрэч, а чацьверты чакае, што скажуць яму ў Вашынгтоне. Таму адказ на ваша пытаньне, калі пачнуцца сустрэчы, залежыць не ад трох прэзыдэнтаў, а ад чацьвёртага.
Але мы ў любым выпадку падтрымліваем ідэю саміх перамоваў.
Што тычыцца колькасьці сустрэчаў, то для мяне важная ня столькі іх колькасьць, колькі вынік. І калі трэба ня менш за 100 сустрэчаў, я гатовы ўдзельнічаць у іх хоць кожную гадзіну.
Што тычыцца месца правядзеньня, то я магу спаслацца на Аляксандра Рыгоравіча Лукашэнку, які заявіў пра сваё жаданьне правесьці іх у Менску».
Кіраўнік КПРФ Генадзь Зюганаў, адказваючы на гэтае пытаньне, заўважыў:
«Я б на месцы Парашэнкі ня стаў адкладаць гэтыя сустрэчы. Часу, каб спыніць кровапраліцьце ва Ўкраіне, застаецца ўсё меней і меней. Нельга затрымлівацца, трэба сядаць за стол перамоваў».
Зюганаў і Сіманенка выйшлі на прэс-канфэрэнцыю да журналістаў у гатэлі «Эўропа», падводзячы вынікі свайго візыту ў Менск і сустрэчы з кіраўніком краіны Аляксандрам Лукашэнкам.
Кіраўнік Беларусі сёньня заявіў пра магчымыя сустрэчы з удзелам кіраўнікоў Беларусі, Казахстану, Расеі і, магчыма, Украіны. Паводле словаў Лукашэнкі, яны заплянаваныя на бліжэйшы час. Месца сустрэч афіцыйна не называецца.
Гэтую заяву Лукашэнка зрабіў сёньня ў Менску на сустрэчы з кіраўнікамі кампартыяў Расеі і Ўкраіны.
