Правядзеньне вучэньняў вядзе да эскаляцыі сытуацыі — заявіла афіцыйны прадстаўнік Дзярждэпартамэнта ЗША Джэн Cакі.
«Мы глыбока занепакоеныя плянамі Расеі правесьці масштабныя паветраныя вучэньні каля ўкраінскай мяжы на гэтым тыдні. Падобныя вучэньні правакацыйныя і вядуць да эскаляцыі сытуацыі», — адзначыла Cакі.
Па словах Сакі, Расея зможа таксама перадаць сэпаратыстам ва Ўкраіне больш важкія ракетныя ўстаноўкі. Вашынгтон адрэагуе на гэта, як толькі будзе мець дакумэнтальныя доказы.
4 жніўня Міністэрства абароны Расеі паведаміла пра правядзеньне вучэньняў пры ўдзеле больш як ста самалётаў ваенна-паветраных сілаў Расеі ў Заходняй і Цэнтральнай акругах. Расея тлумачыць вучэньні плянам па баявой падрыхтоўцы, зацьверджаным яшчэ ў мінулым годзе.
