Лінкі ўнівэрсальнага доступу

Магілёўская міліцыя да «дэсантнікаў» з пляшкамі ставіцца паблажліва


Сёньня ў Беларусі адзначаецца Дзень дэсантнікаў і сіл спэцыяльных апэрацыяў. Сьвяткуюць яго з размахам. Для падтрыманьня грамадзкага парадку мабілізуецца міліцыя, бо гарады навадняюць п’яныя былыя дэсантнікі. Выпіўка ў грамадзкіх месцах, акунаньне ў фантаны, бойкі — нязьменныя атрыбуты такога сьвяткаваньня. Як адзначылі былыя дэсантнікі свой дзень у Магілёве?

Адзначаць свой дзень былыя дэсантнікі пачынаюць зранку невялікімі групамі. У Магілёве адно з улюблёных месцаў іхнага гуртаваньня — парк на замчышчы. Сёньня тут сабралася няшмат хлопцаў у цяльняшках. Усе яны служылі ўжо ў беларускім дэсанце. На пытаньне, у чым ягоная адметнасьць ад, напрыклад, расейскага, хлопцы адказваюць:

«Беларускі дэсант ёсьць, але мы проста яго не адрозьніваем ад савецкага. Гэта адзін і той жа дэсант. Мы ў Расеі не служылі. Мы прысягалі сваёй роднай Рэспубліцы Беларусь. Нас усіх аб’ядноўвае блакітнае неба над галавой. У Расеі гэтак жа адзначаюць дзень дэсантніка 2 жніўня. І ва Ўкраіне той жа, праўда ня ведаем, як будзе цяпер».

На прапанову працягнуць гутарку пра падзеі ва Ўкраіне хлопцы не пагадзіліся. Заявілі, што ў сьвяточны для іх дзень гэтая тэма непажаданая. Калі б такі канфлікт як ва Ўкраіне адбыўся б у Беларусі, то, як сьцьвярджаюць суразмоўцы, яны б баранілі сваю краіну.

«Калі б на наш дом напалі, то кожны б бараніў яго, бараніў бы сваю сям’ю — аднолькава. З тым канфліктам ва Ўкраіне, што мы можам цяпер парабіць? Так мы братэрскія людзі — усе мы славяне. У нас ёсьць спагада да іх. Гэта ўсё палітыка. Там унутраны канфлікт. Нам туды няма чаго лезьці».

2 жніўня. Ранак. Былыя дэсантнікі зьбіраюцца на сьвяткаваньне

2 жніўня. Ранак. Былыя дэсантнікі зьбіраюцца на сьвяткаваньне

Былыя вайскоўцы прызнаюцца, што іншым разам перабіраюць з актыўнасьцю сьвяткаваньня, але тут жа заяўляюць, што 2 жніўня для іх сьвята душы, таму ня грэх і выпіць і павесяліцца.

З надыходам дзённай сьпякоты былыя дэсантнікі зьмяняюць месцы ранішняй сваёй дысьлякацыі бліжэй да фантанаў. Некаторыя ўжо на ладным падпітку без асаблівых роздумаў кідаюцца ў ваду. Навошта яны гэта робяць?

«Традыцыя ў гэтым ёсьць, але яна сыходзіць у глыбокія карані, якія нам, выбачайце, невядомыя, — адказвае адзін з тых хто пабываў фантане. — Мы спрабавалі знайсьці адказ на гэтае пытаньне, але нам гэтага не ўдалося».

Сьвяткаваньне ў разгары. Купаньне ў фантанах

Сьвяткаваньне ў разгары. Купаньне ў фантанах

Купаньне былых дэсантнікаў у фантанах мінакі успрымаюць па-рознаму — хто з ўсьмешкай, хто абыякава, а хто незадаволена. Некаторыя фатаграфуюць.

Адна з жанчын з усьмешкай адзначыла, што будзе пасьля купаньня былых дэсантнікаў у фантанах: «Пад вечар будзе невялікая бойка зь біцьцём твараў».

Традыцыйны атракцыён купаньня былых дэсантнікаў прыцягвае ўвагу мінакоў

Традыцыйны атракцыён купаньня былых дэсантнікаў прыцягвае ўвагу мінакоў

На заўвагу жанчыны адзін з былых дэсантнікаў адказаў: «Чаму, калі вялікая сьпёка і людзі купаюцца, то гэта нармальна, а калі дэсантнікі лезуць у фантаны, то для людзей гэта дзіка? Чаму гэта так? Для мяне гэта нармальна».

Мінакі прызнаюцца, што на Дзень дэсантніка не хацелі б сустракацца з тымі, хто яго сьвяткуе.

Былыя дэсантнікі на разагрэве перад купаньнем ў фантанах

Былыя дэсантнікі на разагрэве перад купаньнем ў фантанах

«Яны з такім разгулам сьвяткуюць, што лепей іх абысьці бокам, — зазначае жанчына, пабачыўшы, як дэсантнікі купаюцца. — У іх гэтак павялося, і ўсе пра гэта ведаюць: калі Дзень дэсантнікаў, то ўвесь горад шуміць».

Пра тое ж кажа яшчэ адна суразмоўніца: «Сярод іх ёсьць адэкватныя, што паглядзець прыемна, а ёсьць такія, што на ладным падпітку, дык тады жаданьне абысьці».

Чаму б на сьвята не падапхнуць маршрутку?

Чаму б на сьвята не падапхнуць маршрутку?

Ці скончыцца сёлетні Дзень дэсантніка бойкамі, стане вядома зь міліцэйскіх зводак. Пакуль рыхтаваўся гэты сюжэт іх не было. Міліцыя паблажліва ставілася да кампаніяў хлопцаў у цяльняшках з бутэлькамі алькаголю.

Паказаць камэнтары

XS
SM
MD
LG