Пра гэта паведамляе Служба бясьпекі Ўкраіны.
У ведамстве паведамілі, што Балабанаў пакінуў месца службы на знак пратэсту супраць агрэсіі Расеі ў дачыненьні да Ўкраіны.
Расейскі салдат трапіў ва Ўкраіну ў ліпені 2014 году з намерам папрасіць палітычнага прытулку.
Былы шараговец расейскай арміі апавёў, што яго ваенная частка была перакінутая ў Растоўскую вобласьць паблізу мяжы з Украінай сёлета ў траўні. Штодня камандзіры пераконвалі армейцаў, што іх рыхтуюць да абароны расейскамоўных грамадзян ва Ўкраіне.
Частка пастаянна даўкамплектоўвалася прафэсійнымі вайскоўцамі зь ліку спэцназаўцаў ГРУ і выхадцамі з Паўночнага Каўказу, якія нелегальна перапраўляліся на Ўсход Украіны.
На ўкраінскую тэрыторыю для падтрымкі тэрарыстаў пераходзіла браняваная ваенная тэхніка з падрыхтаванымі расейскімі баявымі экіпажамі.
«Я прыняў рашэньне ня ўдзельнічаць у братазабойчай вайне і перайшоў на бок Украіны. Гэта мой пратэст супраць палітыкі кіраўніцтва Расеі», — растлумачыў Балабанаў.
«Гэта ўжо ня першы выпадак пераходу расейскіх вайскоўцаў на бок Украіны. Раней сваё жаданьне служыць на баку ўкраінскіх войскаў у зоне антытэрарыстычнай апэрацыі выказаў афіцэр ФСБ Расеі Ільля Багданаў», — адзначылі ў СБУ.
