Лінкі ўнівэрсальнага доступу

Менск ня хоча гандлёвай вайны з Кіевам, хоча дыялёгу


Прэсавы сакратар МЗС Беларусі Дзьмітры Мірончык пракамэнтаваў рашэньне Міжведамаснай камісіі па міжнародным гандлі Ўкраіны, якое ў адказ на беларускія дыскрымінацыяйныя захады ў гандлі з Украінай уводзіць мыта на тавары зь Беларусі.

«Мы ня можам пагадзіцца з матывацыяй гэтага рашэньня, бо Беларусь не рабіла якіх-колечы крокаў у дачыненьні менавіта да Ўкраіны. Тым больш нязгодныя з тым, што нашы крокі тлумачацца як непрыязныя».

МЗС Беларусі тлумачыць, што ліцэнзаваньне імпарту асобных тавараў у Беларусь, якое выклікала негатыўную рэакцыю ўкраінскага боку, распаўсюджана на нявызначанае кола краін, а не скіравана выключна супраць Украіны, і што гэта ўпісваецца ў фармат міжнароднага гандлю.

Ведамства нагадвае, што мэханізм ліцэнзаваньня вызначаны толькі на шасьцімесячны тэрмін, а ўкраінскія партнэры маюць намер абкладаць пошлінамі ў памеры 55–60 працэнтаў выключна беларускія тавары і на пэрыяд да 31 сьнежня 2016 году.

«Разьлічваем, што час, які ёсьць у бакоў да ўступленьня ў сілу рашэньня Міжведамаснай камісіі па міжнародным гандлі Ўкраіны, будзе выкарыстаны для ўрэгуляваньня рознагалосьсяў, якія ёсьць у бакоў, у рэжыме непасрэднага дыялёгу. Бліжэйшым часам у Менску чакаюцца адпаведныя кансультацыі з украінскімі экспэртамі», — адзначаецца ў камэнтары МЗС Беларусі.

Мыта ўведзенае ў адказ на дыскрымінацыйныя і несяброўскія дзеяньні Беларусі ў адносінах да ўкраінскіх вытворцаў напояў і прадуктаў харчаваньня.

На беларускія аўтамабільныя, аўтобусныя пакрышкі, а таксама шыны для выкарыстаньня на сельскагаспадарчых або лесагаспадарчых транспартных сродках Украіна ўводзіць мыта ў памеры 60,05% ад мытнага кошту. Акрамя таго, на лядоўні беларускай вытворчасьці Ўкраіна ўводзіць спэцмыта ад 55,29% да 60,05% у залежнасьці ад аб’ёму халадзільных камэр.

На электрычныя лямпы, мінэральныя і хімічныя ўгнаеньні з утрыманьнем азоту, фосфару і калію, а таксама на малако, вяршкі, ёгурты, кефір, сьметанковае масла, кандытарскія вырабы з цукру, шакаляд і мучныя прысмакі, якія імпартуюцца зь Беларусі, уводзіцца мыта ў памеры 55,29% ад мытнага кошту гэтай прадукцыі.

На беларускае соладавае піва Ўкраіна ўводзіць мыта ў памеры 60,05% ад мытнага кошту. Спэцыяльнае мыта да названых тавараў будзе прымяняцца да 31 сьнежня 2016 году. Рашэньне камісіі ўступае ў сілу праз 10 дзён з моманту апублікаваньня.

З 1 траўня Беларусь увяла ліцэнзаваньне імпарту піва з-за межаў Мытнага саюзу. Украінскія вытворцы піва назвалі гэта дыскрымінацыйным і паведамілі, што ў Беларусі ад іх запатрабавалі падвысіць розьнічную цану на сваю прадукцыю больш як удвая, што аўтаматычна робіць украінскае піва неканкурэнтаздольным на беларускім рынку. Аналягічныя захады Беларусь ужыла і адносна ўкраінскіх кандытарскіх вырабаў.

Паводле дадзеных Дзяржаўнай фіскальнай службы Ўкраіны, у першым паўгодзьдзі 2014 году Беларусь паставіла ва Ўкраіну малака і вяршкоў на 1,3 млн даляраў, што складае 46% ад агульнага імпарту гэтай прадукцыі.

Прафэсар эканомікі Барыс Жаліба лічыць, што гэта адказ украінскага боку на беларускую эканамічную палітыку, на ліцэнзаваньне піва, кандытарскіх вырабаў. Але страчваюць абодва бакі:

Барыс Жаліба

Барыс Жаліба

«Мне падаецца, нягледзячы на тое, што кіраўнік Беларусі заявіў, што расейска-ўкраінскі крызіс ня будзе ўплываць на нашы стасункі з Украінай, адбываецца нешта іншае — насамрэч, пачынаецца нейкая мытная вайна. Страчваюць у экспартна-імпартных апэрацыях і беларускі бок, і ўкраінскі. Я думаю, што Масква неяк уплывае на нашага прэзыдэнта, на наш урад, каб Беларусь усё ж такі далучылася да нейкіх абмежавальных захадаў адносна ўкраінскіх тавараў. А цяпер мы бачым, што разгортваецца гандлёвая вайна. І яна не на карысьць ні Ўкраіне, ні Беларусі. Яна на карысьць, скажам так, палітыцы Расеі адносна Ўкраіны».

Паводле дадзеных Дзяржаўнай фіскальнай службы Ўкраіны, у першым паўгодзьдзі 2014 году Беларусь паставіла ва Ўкраіну малака і вяршкоў на 1,3 млн даляраў, што складае 46% ад агульнага імпарту гэтай прадукцыі.

Паводле інфармацыі прэзыдэнта асацыяцыі «Укркандпрам» Аляксандра Балдынюка, летась Украіна паставіла на беларускі рынак кандытарскіх вырабаў на суму каля 70 мільёнаў даляраў.

Паказаць камэнтары

XS
SM
MD
LG