Лінкі ўнівэрсальнага доступу

На Карлаварскім кінафэстывалі перамог фільм пра падзеі грузіна-абхаскага канфлікту


Грузінскі фільм «Кукурузны востраў» атрымаў перамогу на 49-м міжнародным кінафэстывалі ў Карлавых Варах. Фільм распавядае пра жыцьцё сям’і на фоне драматычных падзеяў на мяжы Грузіі зь яе сэпаратысцкім рэгіёнам Абхазіяй.

Галоўны прыз фэсту — «Крышталёвы глёбус» быў уручаны рэжысэру стужкі Георгію Авашвілі на ўрачыстай вячэры з нагоды закрыцьця кінафэстывалю.

Прызам глядацкіх сымпатыяў адзначаны чэскі фільм «Магічны голас бунтаркі» рэжысэркі Вольгі Соммеравай. Фільм прысьвечаны творчаму лёсу адной з самых вядомых сьпявачак Чэхіі Марты Кубішавай, чый голас стаў адным з пазыўных «аксамітнай рэвалюцыі» 1989 года ў Чэхаславаччыне.

На кінафестывалі ў Карлавых Варах была прадстаўленая дакумэнтальная стужка «Майдан» беларуска-ўкраінскага рэжысэра Сяргея Лазьніцы, а таксама мастацкі фільм «Племя», у якім галоўную ролю сыграла беларуска.

На фестывалі таксама быў распаўсюджаны зварот Чэскага кіна-і тэлевізійнага саюзу (FITES), чэскай Асацыяцыі рэжысэраў і сцэнарыстаў і Асацыяцыі чэскіх кінаапэратараў «Свабоду зьняволенаму ў Маскве ўкраінскаму рэжысэру Алегу Сянцову. Захаваем тэрытарыяльную цэласнасьць Украіны». Як паведамляюць чэскія СМІ, гэты зварот, які ўжо падпісалі больш за 36 тысяч чалавек, накіраваны прадстаўнікам улады Чэхіі.

XS
SM
MD
LG