Лінкі ўнівэрсальнага доступу

66% расейцаў супраць увядзеньня расейскіх войскаў ва Ўкраіну – апытаньне


Большасьць расейцаў супраць увядзеньня расейскіх войскаў ва Ўкраіну, кожны пяты дапускае такую магчымасьць пры ўзьнікненьні пагрозы бясьпекі для грамадзянаў Расеі.

Такія вынікі апытаньня, праведзенага Ўсерасейскім цэнтрам вывучэньня грамадзкай думкі (ВЦИОМ).

За некалькі месяцаў доля рэспандэнтаў, якія дапускаюць, што паміж Расеяй і Ўкраінай у бліжэйшы час можа пачацца вайна, істотна вырасла – з 17% у канцы сакавіка да 30% у чэрвені. Адначасова, значна менш стала тых, хто лічыць неверагодным падобны сцэнар разьвіцьця падзей – сёньня так думаюць 54% (14% называюць ваенныя дзеяньні абсалютна немагчымымі, а 40% – вельмі малаверагоднымі), тады як у канцы сакавіка такіх было 80%. Нарэшце, 11% апытаных заявілі, што такая вайна ўжо ідзе.

Дзьве траціны расейцаў (66%) выказваюцца супраць увядзеньня расейскіх войскаў у Паўднёва-Усходнюю Ўкраіну з мэтай спыненьня ваеннага канфлікту. Эту пазыцыю пераважна падзяляюць пажылыя людзі (71% старэйшыя за 60 гадоў), жыхары буйных і сярэдніх гарадоў (74-75%). Аб неабходнасьці вайсковага ўмяшаньня з боку Расеі заяўляе чвэрць (27%) апытаных, і перш за ўсё жыхары Масквы і Санкт-Пецярбургу (41%), прыхільнікі КПРФ (35%), рэспандэнты зь нізкім даходам (35%).

Пры гэтым, разважаючы над тым, якія падзеі маглі б стаць прычынай для ўводу войскаў, ужо траціна рэспандэнтаў (33%) сказала пра тое, што Расеі ня варта гэтага рабіць ні пры якіх умовах.

Паводле словаў пятай часткі апытаных, расейскія войскі могуць увайсьці на ўкраінскую тэрыторыю, у першую чаргу, у выпадку, калі будуць працягваць гінуць мірныя жыхары ва Ўкраіне (18%), або калі паўстане пагроза тэрарыстычных актаў на тэрыторыі расейскай дзяржавы (18%), працягнуцца напады на КПП на расейска-ўкраінскай мяжы (18%).

Яшчэ 13% апытаных мяркуюць, што прычынай ваенных дзеяньняў можа быць увядзеньне войскаў НАТО на тэрыторыю Ўкраіны. А 10% прапанавалі б адгукнуцца на просьбы пра ўвод войскаў ад самаабвешчаных Данецкай і Луганскай народных рэспублік.

Новыя выпадкі гібелі расейскіх журналістаў лічаць важкай падставай для ўводу войскаў 7% удзельнікаў апытаньня. Іншыя ж (7%) схільныя пагадзіцца на вайсковае ўмяшаньне пры ўмове працягу дывэрсій супраць расейскіх цягнікоў і газаправоду. І толькі 3% рэспандэнтаў заявілі, што ўсяго таго, што адбылося ўжо дастаткова для прыняцьця такога рашэньня.

Апытаньне ВЦИОМ праведзена 21-22, 28-29 чэрвеня 2014 году. Апытана 1600 чалавек у 130 населеных пунктах у 42 абласьцях, краях і рэспубліках Расеі. Статыстычная хібнасьць не перавышае 3,4%.

XS
SM
MD
LG