Лінкі ўнівэрсальнага доступу

logo-print

Кацярына Садоўская: Лукашэнка не захоча агалоскі маёй справы


Кацярына Садоўская

Кацярына Садоўская


Супроць вядомай праваабаронцы, былой палітычнай зьняволенай Кацярыны Садоўскай завялі крымінальную справу паводле артыкула аб зьнявазе Аляксандра Лукашэнкі.

Кацярыне Садоўскай пагражае да 3 гадоў турмы. 26 чэрвеня праваабаронцу выклікалі ў Савецкі раённы аддзел Сьледчага камітэту і паведамілі пра завядзеньне справы. Падставай стаў зроблены ёю запіс у кнізе заўваг Савецкага раённага суду. «Да якога часу будуць выконваць злачынныя загады псыхічна хворага грамадзяніна Лукашэнкі?» — напісала Кацярына Садоўская, адбыўшы паўдня ў судзе, калі напярэдадні чэмпіянату па хакеі ў Менску прэвэнтыўна судзілі грамадзкіх актывістаў:

«Мы чакалі амаль да абеду. Ня толькі я зьвярталася па зьвесткі, але і сваякі, журналісты — але нічога не паведамлялі. І толькі калі я напісала заўвагу ў гэтую кнігу заўваг, нам вывесілі сьпіс, які судзьдзя і ў якім кабінэце каго будуць судзіць».

У 2006 годзе Кацярыну Садоўскую ўжо былі асудзілі за абразу Лукашэнкі і судзьдзі на 2 гады зьняволеньня. Амаль год праваабаронца адбыла ў сьледчым ізалятары, псыхіятрычнай лячэбніцы і ў гомельскай жаночай калёніі і вызвалілася датэрмінова. Праваабаронца згадала, што і пасьля адбыцьця першага пакараньня ёй даводзілася рабіць запісы ў кнігі заўваг судоў і дзяржаўных устаноў. Аднойчы зладзілі праверку, але сьледчыя спаслаліся на «неразборлівасьць» почырку і справу закрылі. «А тут мышы выслужваюцца перад сваім начальствам», — камэнтуе Кацярына Садоўская завядзеньне справы ў Савецкім райаддзеле Сьледчага камітэту.

Праваабаронца ўсё ж мяркуе, што да суду справа ня дойдзе — «Бо тады прыйдзецца агучваць усе дакумэнты пра псыхічны стан спадара Лукашэнкі, а яны гэтага ня хочуць», — кажа спадарыня Садоўская.

«Мяркую, Лукашэнка пабаіцца публічнага працэсу. Бо на ім будуць зачытаныя ўсе заключэньні лекараў, прагледжаны фільм „Хросны бацька“, бо ўсё гэта я запатрабую далучыць да матэрыялаў справы. Калі не захоча гэтакай агалоскі, то справу закрые, як закрываў неаднойчы. У мяне такое не ўпершыню — і ў Першамайскім раёне, і ў Фрунзенскім».

З 1988 году Кацярына Садоўская, былая працаўніца радыятарнага заводу, займаецца грамадзкай і праваабарончай дзейнасьцю. Сваю цяперашнюю актыўнасьць Садоўская тлумачыць гэтак:

«Я выклікала агонь, як кажуць, на сябе. Бо ў нас у Беларусі, на жаль, няма мужчын, якія могуць выклікаць агонь на сябе».

XS
SM
MD
LG