Лінкі ўнівэрсальнага доступу

logo-print

Кіраўнік МЗС Украіны патлумачыў, чаму абразіў Пуціна


Кіраўнік МЗС Украіны Андрэй Дзешчыца патлумачыў сваё абразьлівае выказваньне на адрас прэзыдэнта Расеі Уладзіміра Пуціна экстрэмальнай сытуацыяй, якая ўзьнікла ля амбасады Расеі ў Кіеве. Пра гэта дыплямат заявіў у эфіры радыёстанцыі «Эхо Москвы».

«У гэты момант галоўнае было — утрымаць людзей», — растлумачыў ён.

Дзешчыца прыбыў да амбасады Расеі, каб супакоіць натоўп, які ўчыніў беспарадкі. Падчас размовы з актывістамі журналісты зафіксавалі, як ён прасьпяваў нецэнзурную песеньку ў адрас прэзыдэнта Расеі.


Размаўляючы з прысутнымі, кіраўнік МЗС Украіны таксама ня выключыў разрыву дыпляматычных адносін з Масквой. Разам з тым ён адзначыў, што гэта «самая апошняя кропка». «Нам трэба знайсьці ўсе неабходныя мэханізмы. Калі мы разарвем дыпадносіны, мы ня зможам вырашаць пытаньні людзей, якія знаходзяцца на тэрыторыі Расеі», — растлумачыў Дзешчыца.

Некалькі соцень актывістаў сабраліся ў суботу на пікет ля расейскага пасольства і заблякавалі выезд з будынка, а таксама перавярнулі прыпаркаваныя паблізу машыны. Дэманстранты закідалі яйкамі, напоўненымі зялёнкай, фасад амбасады, зьнялі расейскі сьцяг, а затым пачалі закідваць будынак выбуховымі пакетамі і дымавымі шашкамі.

Расея прапанавала Радзе Бясьпекі ААН прыняць заяву з асуджэньнем нападу на амбасаду ў Кіеве. Аднак гэта рашэньне, паводле інфармацыі РІА Навіны, заблякавалі дэлегацыі шэрагу заходніх краінаў: ЗША, Вялікабрытаніі і Францыі.

Ваша меркаваньне

Паказаць камэнтары

XS
SM
MD
LG