Лінкі ўнівэрсальнага доступу

Беларуская чыгунка зноў прыпыняе продаж квіткоў ва Ўкраіну


Беларуская чыгунка часова прыпыняе продаж квіткоў на некаторыя цягнікі, якія праходзяць па тэрыторыі Украіны.

Зроблена гэта па просьбе адміністрацыі «Укрзализниці» ў сувязі з частковай карэкціроўкай графіку руху цягнікоў па тэрыторыі Ўкраіны.

З 15 чэрвеня часова прыпыняецца продаж квіткоў на цягнік № 46/45 Менск — Мінэральныя Воды (уключна зь бесьперасадачнымі вагонамі Берасьце — Мінэральныя Воды і Магілёў — Мінэральныя Воды), з 16 чэрвеня — на цягнікі № 384/383 Баранавічы — Марыюпаль і № 302/301 Менск — Адлер. Акрамя таго, з 17 чэрвеня часова ня будуць прадавацца квіткі на цягнік № 390/389 Менск — Анапа.

«Просім пасажыраў уважліва сачыць за абнаўленьнем інфармацыі пра зьмену ўмоваў продажу праязных дакумэнтаў на цягнікі на афіцыйным інтэрнэт-сайце Беларускай чыгункі, а таксама на інфармацыйных стэндах і касах чыгуначных вакзалаў», — паведамляецца на сайце rw.by.

Падобныя рашэньні прымаліся беларускай чыгункай у красавіку і траўні гэтага года. Яны зьвязаныя з нестабільнай сытуацыяй у Данбасе і расейскай анэксіяй Крыма.
XS
SM
MD
LG