Лінкі ўнівэрсальнага доступу

logo-print

Пракуратура падтрымала скаргу маладафронтаўца супраць міліцыі


Зьміцер Крамянецкі

Зьміцер Крамянецкі

У Цэнтральным судзе Гомеля 3 чэрвеня адбыўся папярэдні разгляд пазову маладафронтаўца Зьмітра Крамянецкага да ўправы ўнутраных спраў Гомельскага аблвыканкаму і Міністэрства фінансаў краіны аб спагнаньні маральнай шкоды памерам 10 мільёнаў рублёў.

У такую суму Зьміцер ацаніў пакуты, якія ён зьведаў за дзесяць сутак — да суду і пасьля яго, знаходзячыся ў ізалятары пры Ельскім райаддзеле міліцыі.

Зьмітра Крамянецкага й Мікалая Дземідзенку 22 лютага затрымалі на мяжы ўкраінскія памежнікі. Актывісты накіроўваліся ў Кіеў на Эўрамайдан. Ахоўнікі мяжы, да якіх, відаць, яшчэ не дайшла інфармацыя пра ўцёкі Януковіча, паставілі штампы ў пашпартах маладафронтаўцаў на забарону ўезду на тэрыторыю Ўкраіны цягам 5 гадоў і адвезьлі іх на беларускі бок, дзе перадалі ельскім міліцыянтам.

Тыя, відавочна, мелі адпаведны загад і склалі адміністрацыйныя пратаколы ў дачыненьні да маладафронтаўцаў на дробнае хуліганства — нібы маладзёны брыдка лаяліся.

Судзьдзя Ельскага раённага суду Іван Цалкоў, які разглядаў міліцэйскія пратаколы, пакараў 24 лютага Зьмітра Крамянецкага Мікалая Дземідзенку 10-суткавым арыштам, які яны і адбывалі ў ізалятары пры Ельскім РАУСе.

«Гэта былі нечалавечыя ўмовы: у камэры на дваіх нас знаходзілася трое. У мяне не было спальнага месца. Камэра цёмная, не праветрывалася, не абсталявана радыёкропкай. Былі напаўгалодныя, есьці давалі толькі раз на дзень. Не было нават кіпеню, прадугледжанага інструкцыяй. Санвузел — побач з нарамі і месцам сталаваньня. Такога зьдзеку мне не даводзілася бачыць за 27 гадоў жыцьця», — расказаў карэспандэнту радыё Свабода спадар Крамянецкі.

Факты неналежных умоваў утрыманьня арыштаваных па скарзе Крамянецкага пацьвердзіла й пракуратура Ельскага раёну, якая па выніках праверкі ўнесла прадстаўленьне на адрас начальніка Ельскага РАУС з патрабаваньнем ліквідаваць выяўленыя парушэньні, а Крамянецкаму паведаміла: «Ваша скарга прызнаная абгрунтаванай і падлягае задавальненьню».

Прадстаўнік Міністэрства фінансаў у Гомельскай вобласьці Сяргей Захарчанка заявіў у судзе, што ягонае ведамства не зьяўляецца належным адказчыкам. Гэта мусіць быць Міністэрства ўнутраных спраў як распарадчык бюджэтных грошай у сваім ведамстве, бо справа, маўляў, не крымінальная, а адміністрацыйная.

Судзьдзя Марына Дамненка, якая даглядае пазоў Зьмітра Крамянецкага, вырашыла запрасіць матэрыялы праверкі ў Ельскай пракуратуры і ў Ельскім раённым судзе адміністрацыйную справу, паводле якой Зьмітра пакаралі 10 суткамі арышту.

26 чэрвеня Цэнтральны суд Гомеля па сутнасьці пачне разглядаць заяву маладафронтаўца аб спагнаньні зь міліцыі маральнай шкоды.
Падтрымаць Зьмітра Крамянецкага ў суд прыехалі гомельскі праваабаронца Леанід Судаленка і менскі маладафронтавец Міхась Мускі

Падтрымаць Зьмітра Крамянецкага ў суд прыехалі гомельскі праваабаронца Леанід Судаленка і менскі маладафронтавец Міхась Мускі

Паказаць камэнтары

XS
SM
MD
LG